सभामुख फेरिएसँगै फेरियो कुर्सी

काठमाडौँ । प्रतिनिधिसभाका नवनिर्वाचित सभामुख डोलप्रसाद अर्याल(डीपी) ले आजदेखि बैठकको अध्यक्षता गरेका छन् । केहीबेरअघि सुरु भएको प्रतिनिधिसभाको बैठक अर्यालले सञ्चालन गरिरहेका छन् ।

यसअघि बसेका प्रतिनिधिसभा दुईवटा बैठकको अध्यक्षता ज्येष्ठ सदस्य अर्जुननरसिंह केसीले गरेका थिए ।

Watch On

केसीको ठाउँमा बैठकको अध्यक्षता गर्न अब निर्वाचित सभामुख अर्याल आए । सभामुखको आसनमा व्यक्ति फेरिए । परिवर्तन यत्तिमात्रै होइन, आजको बैठकमा अरु केही परिवर्तन पनि देखिए ।

मुख्य परिवर्तन त नयाँ प्रतिनिधिसभाले सभामुख पायो ।

दोस्रो परिवर्तन हो– सभामुखको आसन अर्थात कुर्सी ।

बैठक कक्षमा सांसदहरु जस्तो कुर्सीमा बसिरहेका छन्, सभामुख अर्याल पनि त्यस्तै कुर्सीमा बसेर बैठक सञ्चालन गरिरहेका छन् ।
यसअघि सभामुखका लागि विशेष अर्थात अरुभन्दा फरक कुर्सी राखिन्थ्यो । तर, त्यो फरक कुर्सी नवनिर्वाचित सभामुख अर्याललाई मन परेन ।

आइतबार पदभार ग्रहण गरेलगत्तै सभामुख अर्यालले सचिवालयका कर्मचारीलाई निर्देशन दिए– सभामुखलाई पनि सांसदहरुको जस्तै कुर्सीको व्यवस्थापन गरौं । सचिवालयका कर्मचारीले पनि सोही अनुसार सभामुखका लागि नयाँ कुर्सी व्यवस्थापन गरिदिए । नयाँ कुर्सीमा बसेर नयाँ सभामुखले बैठक सञ्चालन गरे ।

अब अर्याल सभामुख हुँदासम्म बैठककक्षमा सांसदहरु जस्तो कुर्सीमा बस्छन्, उनी पनि उस्तै कुर्सीमा बस्नेछन् ।

सभामुखको निजी सचिवालयका अनुसार, सभामुखको चाहनाका आधारमा कुर्सी परिवर्तन गरिएको हो ।