२५ वर्षकी रुविलाई उपसभामुखको आसन

काठमाडौँ । नेपालको प्रतिनिधिसभाले हालसम्मकै कान्छी उपसभामुख पाउँदै छ र उपसभामुखको आसनमा बस्दैछिन्– धनुषाकी २५ वर्षीया रुविकुमारी ठाकुर ।

सांसद बन्नु अघिसम्म उनी धनुषामै सामान्य रोजगारीमा थिइन् र समाजसेवामा सक्रिय थिइन् । उनका लागि सांसद बन्नु नै ‘सरप्राइज’ थियो । श्रम संस्कृति पार्टीले उनलाई समानुपातिक तर्फबाट सांसद चुन्यो । पार्टीले अहिले उनलाई उपसभामुखको उम्मेदवार निर्णय गर्यो ।

Watch On

श्रम संस्कृति पार्टीले मात्रै निर्णय गरेर उनका लागि उपसभामुखको आसन तयार हुँदैनथ्यो । संसदमा झण्डै दुई तिहाइ बहुमत प्राप्त सत्तारुढ दल रास्वपाले पनि उनै रुविलाई समर्थन गर्ने निर्णय गर्यो, रास्वपाकै सांसद समर्थक बसिदिए ।

रास्वपाले नै समर्थन गर्ने भएपछि रुविकुमारी उपसभामुख बन्ने निश्चित भएको छ । आज मनोनयन दर्ता भयो । भोलि बस्ने प्रतिनिधिसभा बैठकमा उपसभामुखका उम्मेदवारीलाई निर्णयार्थ पेस गरिने छ । रास्वपाले नै समर्थन गरेपछि रुवि भोलिदेखि औपचारिक रुपमा उपसभामुख बन्ने छिन् ।

अहिले परिवर्तनको बल नै जेनजी आन्दोलन हो । जेनजी आन्दोलनकै कारण चुनाव भयो, रास्वपा सरकार बन्यो । पहिले सडक आन्दोलन गरेका जेनजी पुस्ताका नवयुवा संसदमा पुगे । त्यही पुस्ताकी एक सदस्य हुन्– रुवि । अब उनै रुवि उपसभामुख बन्दैछिन् ।

धनुषाको सामान्य परिवारकी छोरी रुविलाई राजनीतिमा तानेको जेनजी आन्दोलनले नै हो । पहिले आन्दोलनले तानेर राजनीतिमा ल्यायो, राजनीतिले उपसभामुखमा पुर्यायो ।

रास्वपाले जेनजी आन्दोलनको अपनत्व लियो । जेनजी आन्दोलनपछि नै खुलेको दल हो– श्रम संस्कृति पार्टी । यसको अर्थ यी दुवै दल परिवर्तनका सारथि हुन् । सभामुखमा रास्वपा नेता डीपी अर्याल सर्वसम्मत चुनिए, उपसभामुखमा चुनिँदैछिन्– श्रम संस्कृतिकी रुवि ।

म सक्छु– रुवि

रास्वपाले नै समर्थन गरेपछि रुवि अब उपसभामुख बन्नेछिन् । यति कम उमेरकी युवा उपसभामुख बन्ने निश्चित भएपछि सञ्चारकर्मीहरुले सोधिहाले– तपाईंले उपसभामुखको जिम्मेवारी सम्हाल्न सक्नुहुन्छ ? 
उनले जवाफ दिइहालिन्– म सक्छु ।

उनले थपिन् ‘म देशलाई सबैथोक गर्छु, सधैँ साथ दिन्छु,।’

सभामुखमा निर्विरोध निर्वाचित भएर रास्वपा नेता डीपी अर्यालले इतिहास रचेका छन् । कम उमेरमै उपसभामुख बनेर श्रम संस्कृतिकी रुविले पनि इतिहास रेचकी छन् ।