अर्थमन्त्री वाग्ले र अमेरिकी सहायक विदेशमन्त्रीबीच भेटवार्ता, अमेरिकी लगानीकर्तालाई लगानीका लागि आग्रह

काठमाडौँ। अर्थमन्त्री डा. स्वर्णिम वाग्लेले सरकारले आर्थिक सुधार र लगानीको वातावरण निर्माणलाई प्राथमिकतामा राखेको बताउँदै अमेरिकी लगानीकर्ताहरुबाट पनि सरकारले लगानीको अपेक्षा गरेको बताएका छन् ।

नेपाल भ्रमणमा रहेका अमेरिकी सहायक विदेशमन्त्री एस. पाउल कपुरसँग आज अर्थमन्त्रालयमा भएको भेटमा अर्थमन्त्री वाग्लेले पुराना अनावश्यक कानुनहरूको खारेजी र नयाँ कानुन निर्माणद्वारा आर्थिक सुधार र लगानीको वातावरण सृजना गर्नु सरकारको प्राथमिकता रहेको प्रष्ट पारे ।

Watch On

भेटमा मन्त्री वाग्लेले अमेरिकी लगानीकर्ता तथा गैर आवासीय नेपाली लगानीकर्ताहरूबाट विशेषगरी पर्यटन, स्वच्छ ऊर्जा र सूचना प्रविधिका क्षेत्रमा लगानी अपेक्षित रहेकोसमेत बताए । त्यस्तै,  अर्थमन्त्री डा. वाग्लेले सरकारको मुख्य प्राथमिकता सुशासन, आर्थिक सुधार र गुणस्तरयुक्त भौतिक पूर्वाधार निर्माण रहेको समेत उल्लेख गरे ।

जवाफमा अमेरिकी सहायक विदेशमन्त्री कपुरले नेपाल र अमेरिकाबीचको ऐतिहासिक सम्बन्ध आगामी दिनमा अझ सुदृढ हुने विश्वास व्यक्त गरे । हालै सम्पन्न शान्तिपूर्ण निर्वाचनपश्चात गठित वर्तमान सरकारले लिएको सुधारका कार्यक्रमहरूलाई अमेरिकी राष्ट्रपति र अमेरिकी जनताले सकारात्मकरूपमा नजिकबाट हेरिरहेकोसमेत उनले बताए । अमेरिकी सहायक विदेशमन्त्री कपुरले दुई देशका बीचमा सफल व्यापारिक सम्बन्ध र अमेरिकी अन्तर्राष्ट्रिय विकास तथा वित्तीय संस्थाहरुसँगको साझेदारीमा दुवै देशले लाभ लिन सक्ने पनि बताएको अर्थ मन्त्रालयले जनाएको छ। मन्त्रालयका अनुसार भेटमा वर्तमान सरकार र अमेरिकी सरकारबीच सम्भावित साझेदारीका क्षेत्रहरू, लगानी प्रवर्धन र द्विपक्षीय सहयोगका विषयमा छलफल भएको थियो ।

सो भेटमा अर्थ सचिव डा. घनश्याम उपाध्याय, अर्थ मन्त्रालय र परराष्ट्र मन्त्रालयका पदाधिकारी तथा नेपालका लागि  अमेरिकाका कार्यवाहक राजदूत स्कट उर्बम लगायतका अधिकारीहरुको उपस्थिति थियो।