विश्वकपमा खेल्दै छन् ४० माथिका यी ८ खेलाडी, प्रभाव कस्तो रहला ?

पछिल्ला दशकमा युवा खेलाडीमाथि स्पोर्ट्स निकै मूल्यवान् भन्दै आएको छ । फिफा विश्वकप २०२६ शनिवारबाट सुरु हुँदै छ । तर, अमेरिका, मेक्सिको र क्यानडामा हुने विश्वकपले भने असल, मेहनती र क्षमतावान् खेलाडीलाई पछि पार्न सकिँदैन भनेर प्रमाणित गर्दै छ । 

विश्वकप खेल्ने ४८ टिममा ८ माथि खेलाडी ४० वर्ष कटेका छन् । यही तथ्याङ्कले भन्छ, पछिल्ला २२ प्रतियोगितामा भन्दा यस पटक बढ्दो उमेरका बढी खेलाडीले विश्वकप खेल्दै छन् । पछिल्लो विश्वकपमा पनि ६ गोलकिपर ४० माथिका थिए । 

Watch On

विश्वकप खेल्ने सबैभन्दा पाका खेलाडी क्यामरुनका स्ट्राइकर रोजर मिल्ला पनि हुन् । उनी त सबैभन्दा बढी उमेरमा गोल गर्ने खेलाडी समेत भए । रोजरले सन् १९९४ को विश्वकपमै ४२ वर्षको उमेरमा गोल गरेका छन् । 

क्यामरुन स्ट्राइकरको जस्तै कीर्तिमान बनाउने अवसर पोर्चुगिज कप्तान क्रिष्टियानो रोनाल्डोलाई छ । उनी मात्रै हैन, क्रोएसियाका लुका मोड्रिक, बोस्निया एण्ड हर्जगोबिनाका इडेन जेको पनि ४० वर्ष  माथिका खेलाडी हुन् । तीनै खेलाडीलाई ४० वर्षमाथि गोल गर्ने खेलाडीको नाम लेखाउने अवसर छ । 

तीन देशले संयुक्तरुपमा आयोजना गरेको विश्वकप खेल्ने सबैभन्दा पाका खेलाडी स्कटल्यान्डका गोलकिपर क्रेग गोर्डन हुन् । उनी ४३ वर्षका भएका छन् । उनी समग्रमा विश्वकप खेल्ने दोस्रो पाका खेलाडी बन्दै छन् । यसअघि इजिप्टका इसाम एल हदारीले विश्वकप खेल्दा ४५ वर्ष १६१ दिनका थिए । उनले सन् २०१८ को विश्वकपमा साउदी अरेबियाविरुद्ध खेलेका थिए । त्यति बेला उनी पहिलो रोजाइमै खेलेका थिए । 

यो विश्वकप खेल्दा पोर्चुगिज स्टार रोनाल्डो ४१ वर्षका भए । उनले छैटौँ पटक विश्वकप खेल्दै छन् र टिमलाई पहिलो पटक उपाधि जिताउने योजनामा छन् । यस्तै ४० वर्षका मेक्सिकन गोलकिपर गुइलेर्माे ओचोआ छन् । अर्जेन्टिनाका कप्तान लियोनल मेसी ३९ वर्षको भए । उनी अर्जेन्टिनाले सन् २०२२ मा जितेको विश्वकपको उपाधि रक्षा गर्ने अभियानमा छन् । 

पोर्चुगिज प्रशिक्षक रोबर्टाे मार्टिनेज विश्वकपमा उमेरमात्रै नभएर अनुभवले पनि काम गर्ने बताउँछन् । ‘हामी युवा खेलाडीमा मात्रै भर पर्नु हुँदैन । यस्ता अनुभवी खेलाडीले निर्णायक क्षणमा काम गर्नेछन् । जसले टिमलाई फाइदा पुर्याउँछ ।’

यी त भए, विश्वकप खेल्ने चर्चित पाका खेलाडी । 

४० माथिका खेलाडीमा पहिलो पटक विश्वकप खेल्न लागेको केप भार्डेका खेलाडी समेत छन् । केप भार्डेका गोलकिपर भोजिन्हा ४० वर्षका भएका छन् । 

सन् २०१४ को विश्वकप विजेता जर्मनीका गोलकिपर म्यानुएल नेउर पनि ४० माथिका खेलाडी हुन् । घुँडाको चोटपछि पनि उनी आइतबार हुने नयाँ टोली कुराकाओविरुद्ध खेल्न सङ्घर्ष गरिरहेका छन् । 

उरुग्वेका गोलकिपर फर्नान्डो मुस्लेरा बिहीबार ४० वर्षको जन्मोत्सव मनाउँदै छन् । उरुग्वेले मियामीमा साउदी अरेयिबासँग खेल्दै विश्वकप सुरु गर्नेछ । 

मेसी र रोनाल्डो अघिल्लो महिना मात्रै घाइते भएका थिए । दुवै खेलाडीले चोटसँग सङ्घर्ष गर्दै विश्वकप खेल्ने निश्चित छ । यस्तो अवस्थामा मेसी अर्जेन्टिनाको उपाधि रक्षा गर्ने यात्रामा लागेका छन् । रोनाल्डो पनि पहिलो पटक विश्वकपको उपाधि जित्ने आशासहित लगातार छैटौँ विश्वकपमा गोल गर्ने खेलाडीको कीर्तिमान बनाउने योजनामा छन् ।