रास्वपाले पालिका कमिटीदेखि नै थप्यो पद

काठमाडौँ । राष्ट्रिय स्वतन्त्र पार्टीले पालिका कमिटीदेखि नै पद बढाउने प्रस्ताव गरेको छ । 

स्थापनाको चौथो वर्षमा प्रथम महाधिवेशनको तयारीमा जुटेको रास्वपाले चुनावअघि बृहत् राजनीतिक एकता र समायोजनबाट आएका पक्षलाई समेट्न पालिकादेखि केन्द्रीय समितिसम्म पद थप्न खोजिएको महामन्त्री कबिन्द्र बुर्लाकोटीले जानकारी दिए । 

Watch On

उनकाअनुसार बुधबार बसेको केन्द्रीय सचिवालय बैठकले पालिका, जिल्ला र प्रदेश कमिटीमा एक जना उपसभापति थप्ने प्रस्ताव गरेको हो । तल्ला कमिटीहरुलाई लैंगिकरुपमा समावेशी बनाउन उपसभापति पद थप्ने र त्यसमा महिला अनिवार्य गर्ने प्रस्ताव गरिएको महामन्त्री बुर्लाकोटीले बताए । यो प्रस्तावलाई भोलि चितवनमा बस्ने अन्तिम केन्द्रीय समिति बैठकले अनुमोदन गर्नेछ । 'पालिकादेखि माथि प्रदेशसम्म उपसभापतिएक जना थप्ने र त्यसमा महिला ल्याउने गरी प्रस्ताव आएको छ । केन्द्रीय समितिले टुंग्याउँछ,' उनले भने । 

बुर्लाकोटीकाअनुसार केन्द्रीय सचिवालयले केन्द्रीय पदाधिकारी १३ बाट १९ पुर्याएको छ । अब सभापति १, वरिष्ठ नेता १, उपसभापति एक महिलासहित ३, महामन्त्री २, सहमहामन्त्री एक महिलासहित ५, कोषाध्यक्ष १, सहकोषाध्यक्ष एक महिलासहित ३, प्रवक्ता १, सहप्रवक्ता एक महिलासहित २ जना रहनेछन् । 

यसैगरी १२१ सदस्यीय केन्द्रीय समितिलाई १५८ पुर्याइएको छ । जसमा सय जना निर्वाचित, ५१ जना सभापतिबाट मनोनित र ७ जना प्रदेश सभापति पदेन सदस्य रहनेछन् । यसैगरी केन्द्रीय सचिवालय २५ बाट ३३ सदस्यीय बनाइएको छ । प्रस्तावित विधानलाई केन्द्रीय सचिवालयले स्वीकृत गरिसकेको छ । अब केन्द्रीय समितिले अनुमोदन गर्नेछ ।  

केन्द्रमा उपसभापति, महामन्त्री र सहमहामन्त्री एक एक जना मनोनित गर्ने प्रस्ताव आए पनि ठोस रुपमा अगाडि बढेको छैन । यो विषय पनि केन्द्रीय समितिले तय गर्ने नेताहरु बताउँछन् ।