आकांक्षीहरुलाई सभापति लामिछानेको अपिल : अस्वस्थ प्रतिस्पर्धा नगरौं, सहमतिमै अगाडि बढौं

काठमाडौँ । राष्ट्रिय स्वतन्त्र पार्टीका सभापति रबि लामिछानेले प्रथम राष्ट्रिय महाधिवेशनले एकताको सन्देश दिने विश्वास गरेका छन् । 

केन्द्रीय सचिवालयको अन्तिम बैठकमा सभापति लामिछानेले प्रथम ऐतिहासिक महाधिवेशनले सहमति र एकताको सन्देश दिने बताएका हुन् । 

Watch On

महामन्त्री कबिन्द्र बुर्लाकोटीकाअनुसार सभापति लामिछानेले नेतृत्व चयन सहमतिमा गर्नुपर्नेमा जोड दिएका थिए । 'सहमति र एकताका लागि छलफल गरौं । त्यहीअनुसार तपाईहरु अगाडि बढ्नुस् । साथीहरु नेतृत्व अनुमोदन गरेर अगाडि बढौं । यसो गर्दा मलाई पनि भारी कम हुन्छ । किनकि हामीले गर्नुपर्ने अझै धेरै छ । महाधिवेशनले एकताको सन्देश पनि दिन्छ,' लामिछानेले भनेका थिए ।

सभापति लामिछानेले पार्टी स्थापनाको चार वर्ष थुप्रै उतारचढाव सामना गरेको भन्दै अझै थुप्रै काम गर्न बाँकी रहेकाले सहमतिबाट नेतृत्व टुंगिदा सहज हुने बताएका थिए । यदि सहमति हुन नसकेको खण्डमा लोकतान्त्रिक प्रक्रियालाई आफूले सम्मान गर्ने सभापति लामिछानेको भनाइ थियो । 

सभापति लामिछानेले भर्खर समायोजन भएर आएकाहरुलाई चार महिनामै प्रतिस्पर्धा गर भन्नु उपयुक्त नहुने बताएका थिए । समायोजनको ठूलो महत्त्व भएकाले त्यसलाई समेटेर अगाडि बढ्नुपर्ने धारणा उनको थियो । 

सचिवालय सदस्य गणेश पराजुलीले पनि सभापति लामिछानेले सहमतिबाट पदाधिकारी चयनमा जोड दिएको बताए ।