मेसीले बनाए लगातार सात खेलमा गोल गर्ने कीर्तिमान

काठमाडौं । अर्जेन्टिनाका कप्तान लियोनल मेसीले फिफा विश्वकपमा लगातार सात खेलमा गोल गर्ने कीर्तिमान बनाएका छन् । आइतबार बिहान अमेरिकामा भएको समूह ‘जे’ को खेलमा अर्जेन्टिनाले जोर्डनलाई ३–१ ले हरायो ।

मेसीले यो विश्वकपमा लगातार तीनै खेलमा गोल गर्दा सन् २०२२ को विश्वकपमा प्रिक्वार्टरफाइनलदेखि लगातार चार खेलमा गोल गरेका हुन् । 

Watch On

पहिलो पटक विश्वकप खेलिरहेको जोर्डनले अर्जेन्टिनालाई क्लिन सिट भने राख्न दिएन । एसियाली मुलुक जोर्डनको लागि मौसा तामारीले दोस्रो हाफमा एक गोल फर्काएका थिए । 

प्रशिक्षक लियोनल स्कोलानीले मेसीलाई जोर्डनविरुद्ध प्लेइङ सेटमा खेलाएनन् । मेसी खेलको ६०औं मिनेटमा लौटारो मार्टिनेजको स्थानमा मैदान प्रवेश गरे । मेसीले ८औं मिनेटमा गोल गरेका हुन् । उनले बक्स बाहिरबाट सुन्दर फ्रिकिक गोल गरेका हुन् । 

यसै साता ३९ वर्ष भएका मेसीले यो विश्वकपमा एक ह्याट्रिकसहित ६ गोल गरेका छन् । पहिलो खेलमा अल्जेरियाविरुद्ध तीन गोल गरे । अस्ट्रियाविरुद्ध दुई गोल पनि मेसीकै नाममा रहेको थियो । 

सन् २०२२ को विश्वकपमा फ्रान्सलाई हराउँदै उपाधि जित्दा मेसीले फाइनलमा दुई गोल गरेका थिए । यो विश्वकपको लगातार चार खेलमा मेसीले गोल गरेका हुन् । 

सेमिफाइनलमा क्रोएसियाविरुद्ध ३–० को जितमा पनि मेसीले एक गोल गरेका थिए । क्वार्टरफाइनलमा नेदरल्यान्ड्सविरुद्ध २–२ को बराबरीपछि पेनाल्टी सुटआउटमा जित निकाल्दा मेसीले एक गोल गरेका थिए । प्रिक्वार्टरफाइनलमा अस्ट्रेलियाविरुद्ध २–१ को जित निकाल्दा पनि मेसीले एक गोल गरेका थिए । 

लगातार तेस्रो जितपछि अर्जेन्टिना समूह जेको विजेता बनेको छ । अब, अर्जेन्टिनाले प्रि क्वार्टरफाइनलमा केप भर्डेसँग खेल्नेछ । यही समूहबाट अस्ट्रिया दोस्रो हुँदै नकआउटमा स्थान बनायो । अस्ट्रियासँग समान चार अंक भएपनि तेस्रो स्थानमा रहेको अल्जेरिया उत्कृष्ट तेस्रोमा स्थान बनाउँदै नकआउट खेल्ने पक्का गर्याे । समूहमा जोर्डन लगातार तीन खेलमा पराजित हुँदै घर फर्किएको छ ।