४० वर्षपछि नकआउटमा मेक्सिकोको जित

काठमाडौं । विश्वकपको सह–आयोजक मेक्सिको फिफा विश्वकप २०२६ को अन्तिम १६ मा प्रवेश गर्दा ४० वर्षपछि नकआउटमा जित निकालेको छ । 

बुधबार बिहान घरेलु मैदान अज्टेका स्टेडियममा मेक्सिको आफ्नो  अपराजित यात्रा चौथो खेलसम्म पु¥यो । मेक्सिकोले इक्वेडरलाई २–० हराएको हो । मेक्सिकोको जितमा जुलियन क्विनोनेस र राउल जिमेनेजले समान एक गोल गरेका थिए । पहिलो हाफमै गरेको दुई गोलको अग्रता जोगाउँदै मेक्सिको अर्काे चरणमा प्रवेश गर्न सफल भयो । 

Watch On

यो जित मेक्सिकोले नकआउटमा ४० वर्षपछि निकालेको हो । यसअघि मेक्सिकोले सन् १९८६ यता कुनै पनि नकआउट खेल जित्न सकेको थिएन । त्यो बेला मेक्सिकोले क्वार्टरफाइनल खेलेको थियो । तर, त्यसपछि ७ पटक विश्वकप खेलेपनि अन्तिम १६ बाटै आउट हुँदै आएको थियो । यसपटक ४८ राष्ट्रले विश्वकप खेल्दा मेक्सिको अन्तिम १६ मा प्रवेश गरेको छ । 

अब, उसले क्वार्टरफाइलन पुग्न इंग्ल्यान्ड र कंगोबीचको विजेतासँग ५ जुलाईमा मेक्सिकोमै खेल्नेछ । मेक्सिको टिम हालसम्म दुई पटक मात्रै क्वार्टरफाइनलमा पुगेको छ । सन् १९३० देखि नै विश्वकप खेल्न सुरु गरेको मेक्सिकोले सन् १९७० र १९८६ मा क्वार्टरफाइनल खेलेको थियो । टिम अहिलेसम्म क्वार्टरफाइनलबाट माथि बढ्न सकेको छैन । यसपटक घरेलु समर्थकमाझ नयाँ कीर्तिमान रच्ने अवसर मेक्सिकोलाई रहेको छ । 

यसअघि मेक्सिकोले समूह ‘ए’ मा दक्षिण अफ्रिका, दक्षिण कोरिया र चेक रिपब्लिकलाई पराजित गर्दै सधैबन्दा धेरै ९ अंकसहित नकआउटमा प्रवेश गरेको हो । हारपछि इक्वेडरको यात्रा भने सकिएको छ । 

बुधबार बिहान अन्य खेलमा फ्रान्सले स्विडेनलाई ३–० ले हराउँदै अन्तिम १६ मा स्थान बनाएको छ । फ्रान्सको जितमा केलियन एम्बाप्पेले दुई तथा ब्राड्ली बार्काेलाले एक गोलगरेका थिए । पहिलो हाफमा एक गोल गरेको फ्रान्सले दोस्रो हाफमा दुई गोल थप्यो । 

यो खेलसँगै एम्बाप्पेले अर्जेन्टिनाका कप्तान लियोनल मेसीसँगै समान ६ गोल पूरा गरेका छन् । सर्वाधिक गोल गर्ने खेलाडीमा भने मेसी भन्दा एक गोलले पछि छन् । खेलपछि कप्तान एम्बाप्पेले गोलसंख्या बढाउने भन्दा पनि टिमलाई उपाधि जिताउने मुख्य योजना रहेको बताएका छन् । ‘म यहाँ धेरै गोल गर्न भन्दा पनि टिमलाई उपाधि जिताउन चाहन्छु’, उनले भने, ‘यदि टिमलाई उपाधि जिताउन सफल भएको अवस्थामा धेरै गोल त हुन्छ नै ।’

अब, फ्रान्सले क्वार्टरफाइनल प्रवेशको लागि पाराग्वेको सामना गर्नेछ । पाराग्वेले चार पटकको च्याम्पियन जर्मनीलाई पेनाल्टी सुटआउटमा स्तब्ध बनाएको थियो । कप्तान एम्बाप्पेले पाराग्वेसँग सजक भएको पनि प्रष्ट पारेका छन् । 

बिहानै भएको अर्काे खेलमा नर्वेले आइभरी कोष्टलाई २–१ ले हरायो । चौथो पटक विश्वकप खेलिरहेको नर्वे तेस्रो पटक अन्तिम १६ मा पुगेको हो । यद्यपि नकआउटमा टोलीको यो जित पहिलो पटक हो । सन् १९९८ पछि विश्वकप खेलेको नर्वे पहिलो पटक नै नकआउटमा जित निकाल्न सफल भयो । 

टोलीलाई पहिलो पटक नकआउटमा जित दिलाउँदा विजयी गोल गरेका चर्चित स्ट्राइकर एर्लिङ हाल्यान्डले गरेका थिए । उनले खेलपछि आफूले टिमलाई कीर्तिमानी जित दिलाएको र बाँकी खेल जिते बोनस हुने बताएका छन् । ‘२८ वर्षपछि विश्वकप खेलिरहेका छौं । समूह चरणपछि नकआउटमा पनि जित निकाल्यौं,’ २५ वर्षीय स्ट्राइकरले भने, ‘अब जे हुन्छ हाम्रो लागि बोनस जस्तै हो ।’

अब, नर्वेले क्वार्टरफाइनल प्रवेशको लागि ब्राजिलको सामना गर्र्दैछ । यो खेल ५ जुलाईमा अमेरिकामै हुनेछ । ब्राजिल सर्वाधिक पाँच पटकको विश्व च्याम्पियन हो । उसले नकआउट चरणमा एसियाली महारथी जापानलाई अन्तिम मिनेटमा २–१ ले हराउन सफल भएको थियो । 

हालसम्म विश्वकपको अन्तिम १६ मा मेक्सिको, फ्रान्स, नर्वे, पाराग्वेसँगै, क्यानाडा, मोरक्को, ब्राजिल पुगेका छन् ।