९५ प्रतिशत काम सकिएपछि यस्ताे देखियाे साँगाकाे अन्डरपास

काठमाडाैँ । पूर्वी नेपालबाट काठमाडौं उपत्यका भित्रिने प्रमुख नाका साँगामा निर्माणाधीन अन्डरपासको भौतिक प्रगति करिब ९५ प्रतिशत पुगेकाे आयाेजनाले दाबी गरेकाे छ। 

आयाेजनाका अनुसार मुख्य संरचना र पहुँचमार्ग (एप्रोच सडक) निर्माणको काम पूर्ण रूपमा सकिएकाे छ ।
 

Watch On

अरनिको राजमार्ग अन्तर्गतको सूर्यविनायक–धुलिखेल सडक विस्तार आयोजनाकै सबैभन्दा महत्त्वपूर्ण र आकर्षक हिस्सा मानिएको यो आधुनिक संरचनाले विगतमा यात्रीहरूले भोग्दै आएको सास्तीलाई कम गर्ने आशा गरिएकाे छ । 

याे बनेपातर्फ १९० मिटर र भक्तपुरतर्फ ९०० मिटरको 'एप्रोच सडक'  सहित अन्डरपास  १ हजार १ सय १० मिटर लामाे छ । 

मुख्य अन्डरपास १८ मिटर लामो छ, जसको उचाइ ६ मिटर र चौडाइ साढे १० मिटर रहेको आयाेजनाले जनाएकाे छ ।

अहिले पहिलो चरणको कालोपत्रे सम्पन्न भइसकेको छ भने यतिबेला साइड रिटेनिङ वाल लगाउने र अन्तिम चरणको कालोपत्रे गर्ने काम  भइरहेको छ।

यो आयोजना पूर्ण रूपमा सम्पन्न भएपछि काठमाडौं र भक्तपुरतर्फबाट बनेपातर्फ जाने सवारीसाधनहरू अन्डरपास भएर गुड्नेछन् भने बनेपातर्फबाट काठमाडौं भित्रिने गाडीहरूले माथिल्लो सडक प्रयोग गर्नेछन्।

पहिलो खण्डको तुलनामा साँगादेखि धुलिखेलसम्मको सडक निर्माणको काम निकै द्रुत गतिमा अगाडि बढेको छ। आयोजनाको दोस्रोपटक म्याद थप गरी निर्माण अवधि २०८३ फागुन मसान्तसम्म पुर्‍याइएको छ।