कांग्रेसले छाड्यो एमाले नेतृत्वको कर्णाली सरकार, चार मन्त्रीले दिए राजीनामा

काठमाडौँ । नेपाली कांग्रेसले कर्णाली प्रदेश सरकार छाडेको छ ।

एमाले नेता यामलाल कँडेलको नेतृत्वमा रहेको सरकार बुधबार छोड्दै कांग्रेसबाट प्रतिनिधित्व गरेका चारजना मन्त्रीले राजीनामा दिएका छन् । मन्त्रीहरु घनश्याम भण्डारी, राजीवविक्रम शाह, सुरेश अधिकारी र विजया बुढाले बुधबार विहान मुख्यमन्त्री कँडेललाई राजीनामा बुझाएका हुन् ।

Watch On

सात सदस्यीय मन्त्रिपरिषद्मा एमालेको मुख्यमन्त्रीसहित तीन मन्त्री छन् । 

कांग्रेस कर्णाली प्रदेशसभा संसदीय दलका नेता जीवनबहादुर शाहीले आलोपालो सरकार चलाउने सहमति कार्यान्वयन नहुँदा सरकार छोडेको बताए । उनकाअनुसार सरकार गठन हुँदा आलोपालो गर्ने सहमति भएको थियो । 

'हामीले बजेट पछाडि छाड्छौ भनेर मुख्यमन्त्री यमलाल कँडेललाई भनेका थियौ । सल्लाह भएरै छाडेका हौं । बजेट १९ गते नै पास भइसकेको थियो,' उनले भने । 

अब सरकारको नेतृत्व खोज्नुभएको भन्ने प्रश्नमा उनले थपे, 'आलोपालोको समझदारी भएको थियो । हामीले एमालेको नेतृत्वलाई आलोपालोको समझदारी बनेको थियो नि भनेर सम्झाउने कुरा हुन्छ । उहाँहरुले त्यसलाई कसरी लिनुहुन्छ, अब यसबारेमा थप छलफल गर्दैछौं ।' 

४० सदस्यीय कर्णाली प्रदेशसभामा कांग्रेस १४ नेकपा १४ एमाले १० स्वतन्त्र र राप्रपा १/१ जना छन् । कांग्रेसले साथ छाडेसँगै एमाले सरकार अल्पमतमा परेको छ ।