पक्राउ पूर्जी जारी भएपछि के भन्छन् कांग्रेस सांसद शाह ?

काठमाडौँ । नेपाली कांग्रेसका सांसद अभिषेकप्रताप शाहविरुद्ध पक्राउ पूर्जी जारी भएको छ । 

कृष्णनगर उद्योग वाणिज्य संघका अध्यक्ष अध्यक्ष सीताराम शर्मामाथि आक्रमण गरेको आरोपमा  कपिलवस्तु ३ बाट निर्वाचित सांसद शाहविरुद्ध मुद्दा दर्ता भएर जिल्ला अदालतले पक्राउ पुर्जी जारी गरेको हो ।

Watch On

पक्राउ पूर्जी जारी भएसँगै शाहले प्रतिक्रिया दिँदै कसैलाई सहयोग गरेर बचाउन खोज्दा राजनीतिक प्रतिशोध साँधेर मुद्दा लगाएको र न्यायप्रति विश्वास भएको बताएका छन् । 

'कसैलाई सहयोग गर्न बचाउन जाँदाको प्रतिफल मैले पाएको छु, यो केवल एउटा राजनीतिक प्रतिशोध, चुनावी हारको पीडा, विपक्षीहरुको षड्यन्त्र र प्रशासनलाई समेत गुमराह बनाई मलाई मेरो चरित्र हत्या गर्ने प्रपञ्च बाहेक अरु केही होइन्,' उनले भनेका छन् । 

शाहले सत्यता चाँडै बाहिर आउने र कानुनी लडाइँ विधिसम्मत लड्ने पनि स्पष्ट पारेका छन् । 

शाहको प्रतिक्रिया:

आज सम्मानित जिल्ला अदालतबाट मेरो नाममा पक्राउ पुर्जी जारी भएको जानकारी मैले पाएँ ।

कसैलाई सहयोग गर्न बचाउन जाँदाको प्रतिफल मैले पाएको छु, यो केवल एउटा राजनीतिक प्रतिशोध, चुनावी हारको पीडा, विपक्षीहरुको षड्यन्त्र र प्रशासनलाई समेत गुमराह बनाई मलाई मेरो चरित्र हत्या गर्ने प्रपञ्च बाहेक अरु केही होइन् ।

खाएको विष लाग्ने हो, लाग्नु पनि पर्छ । तर न खाएको विष लाग्दैन । मलाई मेरो देशको संविधान कानुन र सम्मानित न्यायलयप्रति पूर्ण विश्वास छ ।

केही दिनमा सत्यता बाहिर आउने नै छ । कानुनले निर्वाध रुपमा आफ्नो काम गरोस् । म मेरो भागको कानुनी लडाइँ विधिसम्मत लड्ने नै छु र पूर्ण रूपमा कानुनी प्रक्रिया मा सहयोग गर्न तयार छु ।

आरोप लाग्नु र दोषी ठहर हुनु फरक कुरा हो । मैले राजनीतिक जीवनमा तपाईंहरुको अभूतपूर्व जनसमर्थन र माया आशीर्वाद प्राप्त गरेको छु । तपाईं सम्पूर्णको सेवा मा विचलित नभई सदैव लाग्ने छु ।

मलाई माया गर्ने मेरा साथी भाई शुभचिन्तक कार्यकर्ता साथीहरु, कोही कसैले पनि कानुन भन्दा बाहिर कुनै पनि क्रियाकलाप नगर्न र धैर्य गर्न अपिल गर्दछु ।

- अभिषेक प्रताप शाह (प्रतिनिधी सभा सदस्य कपिलवस्तु क्षेत्र नं ३)