दुई सातापछि बस्दै प्रतिनिधिसभा बैठक, प्रधानमन्त्री उपस्थित होलान ?

काठमाडौँ । प्रतिनिधि सभाको बैठक आज बस्दैछ । संसद् सचिवालयकाअनुसार प्रतिनिधिसभाको बैठक बिहान ११ बजे सिंहदरबारस्थित संसद भवनमा बस्दैछ । 

आजको बैठकमा अर्थमन्त्री डा स्वर्णिम वाग्लेले ‘अर्थसम्बन्धी केही नेपाल कानुनलाई संशोधन र खारेज गर्ने विधेयक, २०८३ लाई दफावार छलफलका लागि सम्बन्धित समितिमा पठाइयोस्’ भन्ने प्रस्ताव प्रस्तुत गर्ने कार्यसूची छ । 

Watch On

यस्तै, सभामुख डोलप्रसाद अर्यालले प्रतिनिधिसभाका पूर्वसदस्य एवम् संविधानसभा सदस्य गोपालमान श्रेष्ठको निधनका शोक प्रस्ताव प्रस्तुत गर्ने कार्यसूची छ । 

प्रतिनिधि सभा बैठक ३१ असारदेखि स्थगित छ । सांसदहरुलाई क्षेत्र जानको लागि सभामुख अर्यालले १४ दिन छुट्टी दिएका थिए । 

आज बस्ने बैठकको पूर्वसन्ध्यामा सभामुख अर्यालले सदनलाई प्रभावकारी र मर्यादित बनाउन प्रधानमन्त्री बालेन्द्र शाह, राष्ट्रिय सभा अध्यक्ष नारायण दाहाल, कानुनमन्त्री सोविता गौतम, कांग्रेस र एमालेका संसदीय दलका नेता भिष्मराज आङ्देम्बे र रामबहादुर थापा बादल, संसदमा प्रतिनिधित्व ६ वटै दलका प्रमुख सचेतक र सचेतकसँग छलफल गरेका छन् । 
 
यता बैठकको पूर्वसन्ध्यामा सरकारले ९ वटा विधेयक संसदमा पेस गर्ने निर्णय क्याविनेटबाट गरेको छ । कानुन मन्त्री सोविता गौतमले बैठक सुरु हुना साथ १० वटा विधेयक संसदमा दर्ता गराउने बताएकी थिइन् । उनले सदनलाई बिजनेसको कमी नहुने बताएकी छिन् । 

प्रधानमन्त्री उपस्थित होलान ?

सभामुख अर्यालले बैठकको पूर्वसन्ध्यामा प्रधानमन्त्री शाहसँग भेट गरी प्रतिनिधिसभालाई सम्बोधन गर्न आग्रह गरेका छन् । सभामुखको आग्रहलाई सकारात्मक रुपमा लिँदै शाहले विचार गर्ने जवाफ दिएका छन् ।

सुनसरी घटनाको सन्दर्भमा समेत सम्बोधन गरी सामाजिक सद्भाव र राष्ट्रिय एकताका लागि आह्वान गर्न सभामुख अर्यालले प्रधानमन्त्रीलाई आग्रह गरेका थिए । कुनै ठाेस जवाफ नदिइ विचार गर्छु भनेका प्रधानमन्त्री शाह आजकाे बैठकमा आउँछन कि आउँदैनन् तय भइसकेको छैन ।

तर सरप्राइज दिने शैलीका कारण प्रधानमन्त्री शाह सकारात्मक देखिएकाले आजको बैठकमा उपस्थित हुने अपेक्षा सत्ता पक्ष र सभामुखले गरेका छन् ।

विपक्षी दलहरुले सीमासम्बन्धी दिएको अभिव्यक्तिमा स्पष्टीकरण दिनुपर्ने माग उठाइरहेका छन् । यसमा पनि लचिलो भएका छन् । प्रधानमन्त्रीको राष्ट्रको नाममा सम्बोधन गर्दा सीमा सम्बन्धी अभिव्यक्तिलाई स्पष्ट पारिदिए पुग्ने माग उनीहरुको छ । 

यसैगरी बैठकको पूर्वसन्ध्यामा रास्वपा सभापति रवि लामिछानेले सुनसरी घटनामा सर्वदलीय बैठक राखेर सबै दलको एकीकृत धारणा बनाई सार्वजनिक गरेका छन् ।