बागमतीमा एमालेबाट मुख्यमन्त्री क-कस्को नाम छ चर्चामा?

काठमाडौं । नेकपा एमाले बागमतीमा तीन जना मुख्यमन्त्रीको आकांक्षी देखिएका छन् ।

शनिबार नेकपा एमाले र नेपाली कम्युनिस्ट पार्टी (नेकपा)बीच तीन बुँदे सहमति भएर प्रदेश सरकारको नेतृत्व बाँडफाँट भएसँग एमालेमा प्रतिस्पर्धा चुलिएको हो ।

Watch On

सहमतिअनुसार कोशी, बागमती र लुम्बिनीको मुख्यमन्त्री एमालेले लिने भएको छ । सुदूरपश्चिम र कर्णाली प्रदेशको मुख्यमन्त्री नेकपाको भागमा परेको छ । कर्णालीमा नेकपाका मंगलबहादुर शाही मुख्यमन्त्री नियुक्त भइ शपथ खाइसकेका छन् । मन्त्री भने चयन भएका छैनन् ।

बागमतीमा पनि सरकार गठनको गृहकार्य सुरु भएको प्रदेश सभा सदस्य केशवप्रसाद पोखरेलले जानकारी दिए ।

११० सदस्यीय प्रदेश सभामा हाल १०४ कायम छन् । सरकार बनाउन ५३ जना सांसद आवश्यक पर्छ । प्रदेश सभाको दोस्रो ठूलो दल नेकपासँग २६ सांसद छन् । एमालेसँग २५ सांसद छन् ।

काठमाडौं–९ (२) बाट निर्वाचित प्रदेश सभा सदस्य पोखरेलका अनुसार सरकार गठनका लागि गठबन्धनको मत नपुग्ने भएपछि राष्ट्रिय प्रजातन्त्र पार्टीसँग छलफल भइरहेको छ । राप्रपासँग १२ सांसद छन् ।

‘राप्रपासँग छलफल सकारात्मक छ । टुंगिने अवस्थामा पुगेको छ । राप्रपा सहमत देखिएकाले हामी पनि आन्तरिक छलफलमा छौं,’ उनले भने ।

उनले एमालेबाट तीन जनाको नाम चर्चामा रहेको र आफ्नो पनि दाबी रहेको बताए ।

‘म पनि सिनियरमध्ये हुँ । अहिले तीन जनाको नाम चर्चामा छ । यहाँको मुख्यमन्त्री छान्ने विषय प्रदेश संसदीय दलकै अधिकारको विषय बनाएर खुला छाडियोस् भनेर नेतृत्वलाई आग्रह गरेका छौं,’ उनले भने ।

बागमती प्रदेशको मुख्यमन्त्रीका अहिलेका दल नेता जगन्नाथ थपलिया, मन्त्री किरण थापा र पोखरेलको नाम चर्चामा छ ।

अध्यक्ष ओलीले थपलियालाई मुख्यमन्त्री बनाउन चाहेका छैनन् । उनको रोजाइ किरण थापा छन् ।

थापा तिनै हुन्, जसले अध्यक्ष ओलीलाई जेनजी आन्दोलनपछि गुण्डुमा बासको प्रबन्ध गरिदिएका थिए । उनी भक्तपुर २ (१) बाट प्रदेश सभामा निर्वाचित हुन् ।

पोखरेल पनि दुईपटक प्रदेश सभामा चुनाव जितिसकेकाले आफू नै मुख्यमन्त्री बन्नुपर्ने अडानमा छन् ।

‘कि नेतृत्वले सबैलाई मान्य हुने प्रस्ताव ल्याउनुपर्‍यो । होइन भने संघीयताको मर्मअनुसार प्रदेशलाई नै अधिकार दिनुपर्‍यो । आफ्नो निर्णय गर्न प्रदेश संसदीय दल सक्षम छ । अनुभवको विकास पनि हुन्छ,’ उनले भने ।