सांसद आरेनले भने– सरकार जिम्मेवारीबाट नभागोस्

काठमाडौं । श्रम संस्कृति पार्टीका सांसद आरेन राईले प्रधानमन्त्री बालेन शाह नेतृत्वको सरकार मुलुकको वर्तमान परिस्थितिप्रति गम्भीर बन्न नसकेको आरोप लगाउँदै देश सञ्चालन गर्न नसक्ने अवस्था भए जिम्मेवारीबाट अलग हुन आग्रह गरेका छन् ।

बिहीबार प्रतिनिधि सभाको बैठकमा बोल्दै राईले सरकार अहिले मौन बसेर होइन, जनतामाझ पुगेर सूचना संकलन गर्ने, संवाद बढाउने र शान्ति–सुरक्षा कायम गर्न सक्रिय हुनुपर्ने बताए । सरकारले अभिभावकीय भूमिका निर्वाह गर्न नसकेको टिप्पणी गर्दै उनले देश र जनतालाई अभिभावकविहीन बनाउने अवस्था स्वीकार्य नहुने बताए।

Watch On

‘यदि प्रधानमन्त्रीले अथवा अहिलेको सरकारले देश चलाउन नसक्ने अवस्था हो भने हात ठड्याए हुन्छ । त्यो पनि गर्न सकिन्छ,’ उनले भने, ‘रास्वपा आज दुई तिहाइको नजिक छ । २८२ सांसद हुनुहुन्छ, कोही न कोहीले देशको नेतृत्व गर्ला।’

राईले सरकारलाई जिम्मेवारीबाट नभाग्न चेतावनी दिँदै या त प्रभावकारी रूपमा काम गर्न, नभए देश सञ्चालन गर्न नसक्ने स्वीकार गरेर नयाँ नेतृत्वका लागि मार्ग प्रशस्त गर्न आग्रह गरे ।

‘यो ढंगले अभिभावकविहीन बनेर देश चलाउन पाइँदैन । देश र जनतालाई यसरी टुहुरो बनाउन पाइँदैन,’ उनले भने, ‘त्यसैले सरकार कि त मैदानमा उत्रिनुपर्‍यो, कि त सक्दिनँ भनेर जिम्मेवारी छाड्नुप¥यो ।’

सांसद राईले सुनसरी घटनापछि सर्वदलीय बैठक बोलाएको भन्दै रास्वपा सभापति रवि लामिछानेको प्रशंसा पनि गरे । सामाजिक सद्भाव कायम गर्न सबै राजनीतिक दल एकजुट हुनुपर्ने र त्यसको नेतृत्व सरकारले नै लिनुपर्ने उनको भनाइ थियो ।