कांग्रेसको प्रश्न– सुनसरीमा नागरिकको ज्यान जाने गरी गोली चलाउनुपर्ने अवस्था किन आयो ?

काठमाडौं । प्रमुख प्रतिपक्षी दल नेपाली कांग्रेसले सुनसरी घटनामा नागरिकको ज्यान जाने गरी गोली चलाउनुपर्ने अवस्था किन सिर्जना भयो भन्ने विषयमा सरकारसँग जवाफ मागेको छ । कांग्रेसले प्रधानमन्त्री बालेन शाह र गृहमन्त्री सुधन गुरुङ घटनापछि मौन बसेको आरोप पनि लगाएको छ ।

बिहीबार प्रतिनिधिसभाको बैठकमा बोल्दै प्रमुख प्रतिपक्षी दल नेपाली कांग्रेसकी प्रमुख सचेतक बासना थापाले घटनाबारे सरकारको धारणा सार्वजनिक हुन नसकेको भन्दै प्रश्न उठाइन् ।

Watch On

‘नागरिकको ज्यान जाने गरी गोली चलाउनुपर्ने अवस्था किन आयो?’ उनले सरकारसँग प्रश्न गरिन् ।

थापाले सुनसरीको कप्तानगन्जमा एक नेपाली युवाको ज्यान गएको र दर्जनौँ व्यक्ति गोली लागेर घाइते भएको उल्लेख गर्दै घटनापछि सरकारको भूमिका नदेखिएकोप्रति चिन्ता व्यक्त गरिन् ।

‘एउटा परिवारले आफ्नो छोरा गुमाएको छ, एउटी आमाले आफ्नो कोख रित्याएकी छन्, एउटा बाबुले आफ्नो सहारा गुमाएका छन् । तर यति ठूलो घटनापछि पनि सरकार मौन छ,’ उनले भनिन् ।

यस्ता घटनामा विगतमा कडा प्रतिक्रिया जनाउने प्रधानमन्त्री र संसदमा भावुक हुने गृहमन्त्री अहिले मौन बसेको भन्दै थापाले यसले न्यायप्रतिको नागरिकको विश्वास र राज्यप्रतिको भरोसा कमजोर बनाएको बताइन् ।

उनले प्रधानमन्त्री बालेन शाहले काठमाडौं महानगरपालिकाको प्रमुख हुँदा भदौ २३ को घटनापछि व्यक्त गरेको धारणा स्मरण गराउँदै अहिले प्रधानमन्त्री भएपछि व्यवहार परिवर्तन भएको आरोप पनि लगाइन् ।

‘एउटा नेपाली युवाको मृत्यु हुँदा त्यो संवेदनशीलता कहाँ हरायो? त्यो आवाज आज किन सुनिँदैन? तपाईंले लगाएको कालो चस्माले मृत्यु र पीडाको रङ पनि फरक–फरक देख्छ र?’ उनले प्रश्न गरिन् ।