कांग्रेस महाधिवेशन सार्न सानेपामा बैठक

काठमाडौँ । कांग्रेसको १५औं महाधिवेशन केही दिन पर सार्न अहिले केन्द्रीय कार्यालय सानेपामा बैठक बसिरहेको छ । कांग्रेसले असोज १६ गतेदेखि १९ गतेसम्म काठमाडौँको खुलामन्चमा १५औं महाधिवेशन गर्ने तयारी गरेको थियो । 

Watch On

तर, एक महिनायताका दुई दुई वटा प्राकृतिक विपत्तिका कारण समयमै तल्लो तहका अधिवेशन नसकिने निष्कर्षमा पुगेपछि कांग्रेसले महाधिवेशन सार्ने तयारी गरेको हो । 

सहमहामन्त्री उदय शमशेर राणाले अहिले केन्द्रीय कार्यालयमा बैठक बसिरहेको जानकारी दिए । ‘महाधिवेशन सार्ने कन्फर्म भइसकेको छैन, सार्ने किन नसार्ने, सारे कति दिन सार्ने भन्ने विषयमा अहिले छलफल भइरहेको छ’ उनले भने । 

कांग्रेसले वडा, पालिका र क्षेत्रीय अधिवेशन गरेर महाधिवेशन गर्ने तालिका बनाइएको थियो । तालिका अुनसार वडा र पालिका अधिवेशन भइसके पनि क्षेत्रीय अधिवेशन भने जारी नै । असोज १० गतेका लागि क्षेत्रीय अधिवेशन तोकिए पनि वर्षा, बाढी र पहिरोका कारण क्षेत्रीय अधिवेशनका लागि आज (१३गते) सम्मका लागि समय दिइएको थियो । अधिकांश निर्वाचन क्षेत्रमा आज क्षेत्रीय अधिवेशन भइरहेको छ । 

तर, केही विवादित र विपद् प्रभावित क्षेत्रमा भने क्षेत्रीय अधिवेशन भइसकेको छैन । कांग्रेसमा क्षेत्रीय अधिवेशनबाट महाधिवेशन प्रतिनिधि निर्वाचित हुन्छन् । 

अहिलेकै अवस्थामा क्षेत्रीय अधिवेशनबाट निर्वाचित महाधिवेशन प्रतिनिधि असोज १६ गतेसम्म काठमाडौँ आइपुग्न नसक्ने निष्कर्षमा नेताहरु पुगेका छन् । 

एक पदाधिकारीका अनुसार, महाधिवेशन बढीमा एक सातासम्म पर सार्ने तयारी छ । हाल महाधिवेशनका लागि तोकिएको अन्तिम १९ गते महाधिवेशन सुरु गर्ने वा अझ दुई दिन पर सारेर २१ गते सुरु गर्ने भन्नेमा नेताहरुबीच सहमति भइसकेको छैन । 

कांग्रेसले महाधिवेशनका लागि अन्य दलका शीर्ष नेताहरुलाई निम्तो पठाइसकेको छ । यदि महाधिवेशनको मिति परिवर्तन गरिए यसअघि जो जसलाई निम्तो पठाइएको थियो, उनीहरुलाई फेरि अर्को निम्तो पठाउनु पर्ने एक नेताले बताए ।