निर्माणमा ढिलाइ गर्ने व्यवसायीका ६ ठेक्का तोडिए, ४९ करोड दाखिला गराउन पत्राचार

अछाम । निर्धारित समयमा निर्माण सम्पन्न नगर्ने निर्माण व्यवसायीविरुद्ध सरकारले ठेक्का तोड्ने प्रक्रिया अघि बढाएको छ। अपेक्षित प्रगति नभएपछि पूर्वाधार विकास मन्त्रालयको अछाम डिभिजनले ६ वटा रुग्ण ठेक्का अन्त्य गरेको छ।

Watch On

पूर्वाधार विकासमन्त्री सुनिल लम्सालका अनुसार ठेक्का अन्त्य गरिएका निर्माण व्यवसायीबाट ४९ करोड ६ लाख रुपैयाँभन्दा बढी रकम दाखिला गराउन पत्राचार गरिएको छ।

ठेक्का तोडिएका योजनामध्ये अछामको मंगलसेन–सुखाड–खेतगैरे–जुलिमारे–ढकारी सडक निर्माण पनि छ। २०७९ वैशाख १६ गते सम्झौता भएको उक्त १० किलोमिटर सडकको निर्माण अवधि २०८३ वैशाख १६ गतेसम्म थपिएको थियो। तर, निर्माणको भौतिक प्रगति १९.८३ प्रतिशतमा सीमित भएपछि ठेक्का अन्त्य गरिएको मन्त्री लम्सालले बताएका छन्।

मन्त्री लम्सालका अनुसार २०७६ सालदेखि निर्माण अलपत्र परेका विभिन्न योजनाका ठेक्का पनि अन्त्य गरिएका छन्। तीमध्ये साँफे–मार्तडी सडक मर्मत, चौखुट्टे क्षेत्रमा सडक मर्मत तथा नाली निर्माण र बाजुराको कोल्टी–कवाडी–बिच्छ्याँसैन सडक निर्माणलगायतका योजना छन्।

समयमै काम नगर्ने निर्माण व्यवसायीका ठेक्का अन्त्य गर्ने कामलाई तीव्रता दिइएको मन्त्री लम्सालले सामाजिक सञ्जाल फेसबुकमार्फत बताएका छन्।

समयमै काम सम्पन्न नगर्दा सार्वजनिक पूर्वाधार निर्माण प्रभावित भइरहेका बेला ठेक्का अन्त्यसँगै सम्बन्धित निर्माण व्यवसायीबाट रकम असुल गर्ने प्रक्रिया पनि अघि बढाइएको मन्त्रालयले जनाएको छ।