पूर्वाधार

बनेपा सडक खण्ड दुई महिनाभित्र कालोपत्रे गर्ने लक्ष्य छ– सुनिल लम्साल

सिधाकुरा

बिहीबार, कात्तिक १२, २०८३

बनेपा सडक खण्ड दुई महिनाभित्र कालोपत्रे गर्ने लक्ष्य छ– सुनिल लम्साल

काठमाडौं । लामो समयदेखि विवादका कारण रोकिएको सूर्यविनायक–धुलिखेल सडक आयोजनाअन्तर्गत बनेपा बजार क्षेत्रको सडक निर्माण पुनः सुरु भएको छ। पूर्वाधार विकासमन्त्री सुनिल लम्सालले आगामी दुई महिनाभित्र उक्त सडकखण्डमा कालोपत्रे सम्पन्न गर्ने लक्ष्य राखिएको बताएका छन्।

Watch On

सडकको सेन्टरलाइन र चोकको संरचनासम्बन्धी विवादका कारण निर्माण रोकिएको थियो। मन्त्रालयको पटक–पटकको सहजीकरणपछि विवाद समाधान भएसँगै निर्माण अघि बढाइएको मन्त्री लम्सालले बताए।

हाल निर्माणस्थलमा पुरानो सडकको सतह हटाउने काम भइरहेको छ। बाँकी सडकखण्डलाई सर्भिस लेनसहित चार लेनमा स्तरोन्नति गरी यसै वर्षभित्र निर्माण सम्पन्न गर्ने लक्ष्य रहेको उनले बताए।

मन्त्री लम्सालका अनुसार साँगा–धुलिखेल सडकखण्डको सर्भिस लेनसहित कुल लम्बाइ ७.९ किलोमिटर छ। त्यसमध्ये ६.५ किलोमिटर सडकमा कालोपत्रे सम्पन्न भइसकेको छ भने अब १.४ किलोमिटर सडक निर्माण गर्न बाँकी छ।

बाँकी सडकखण्डको निर्माणलाई तीव्रता दिँदै सर्भिस लेनसहित चार लेनमा स्तरोन्नति गरिने मन्त्रालयले जनाएको छ।

लामो समयदेखि रोकिएको निर्माण पुनः सुरु भएपछि बनेपा बजार क्षेत्रको यातायात व्यवस्थापन सहज हुने र सडक पूर्वाधारमा सुधार आउने अपेक्षा गरिएको छ।

प्रकाशित मिति: बिहीबार, कात्तिक १२, २०८३

प्रतिक्रिया दिनुहोस्