समाज

तीन वर्षदेखि अलपत्र मेची करिडोरको ठेक्का तोडियो

सिधाकुरा

बिहीबार, कात्तिक १२, २०८३

तीन वर्षदेखि अलपत्र मेची करिडोरको ठेक्का तोडियो

इलाम । तीन वर्षदेखि अलपत्र मेची करिडोरअन्तर्गत बेलासे–गोलाखर्क भञ्ज्याङ सडकको ठेक्का सम्झौता अन्त्य गरिएको छ। पटक–पटक म्याद थप गर्दा पनि निर्माणले गति लिन नसकेपछि पूर्वाधार विकास मन्त्रालयअन्तर्गतको सडक डिभिजन कार्यालय इलामले ठेक्का तोडेको हो।

Watch On

मेची करिडोर (केचना–कञ्चनजङ्घा सडक) अन्तर्गतको ९.५ किलोमिटर सडक स्तरोन्नतिका लागि २७ करोड २२ लाख रुपैयाँमा ठेक्का सम्झौता भएको थियो। २०८० पुस २९ गतेभित्र सम्पन्न हुनुपर्ने आयोजना पटक–पटक म्याद थप्दा पनि ४७ प्रतिशत मात्रै भौतिक प्रगति भएको मन्त्रालयले जनाएको छ।

पछिल्लो सात महिनामा तीन प्रतिशतभन्दा कम प्रगति भएपछि ठेक्का सम्झौता अन्त्य गरिएको हो।

सडक डिभिजन कार्यालय इलामले आर्थिक वर्ष २०८१/८२ देखि हालसम्म १२ वटा ठेक्का सम्झौता अन्त्य गरिसकेको छ। यस क्रममा निर्माण व्यवसायीबाट पेस्कीबापतको दुई करोड ३८ लाख रुपैयाँ असुल गरिएको छ। त्यस्तै, ६ करोड ७९ लाख रुपैयाँ बराबरको कार्यसम्पादन जमानत जफत गर्न सम्बन्धित बैंकलाई पत्राचार गरिएको मन्त्रालयले जनाएको छ।

ठेक्का अन्त्य गरिएको सडकखण्डको निर्माणलाई निरन्तरता दिन आवश्यक स्रोत सहमति र बहुवर्षीय ठेक्का सहमति प्राप्त गरी नयाँ ठेक्का प्रक्रिया अघि बढाइने मन्त्रालयले जनाएको छ।

प्रकाशित मिति: बिहीबार, कात्तिक १२, २०८३

प्रतिक्रिया दिनुहोस्