बन रक्षक बनाइदिने भन्दै पूर्वमन्त्री यादवले लिएका थिए चार लाख

बन रक्षक बनाईदिने भन्दै लुम्बिनी प्रदेशका पूर्वमन्त्री बिजयबहादुर यादवले चारलाख घुस मागेका दाङका एक युवाले आरोप लगाएका छन् । लुम्बिनी प्रदेशको भूमि व्यबस्था, कृषि तथा सहकारी मन्त्री बनेका बेला बाँकेका यादवले दाङ दंगीशरण गाउँपालिका ४ मिरौली निवासी ३७ बर्षीय हेतराम चौधरीसंग बिभिन्न समयमा गरि चार लाख रुपैँया घुस रकम लिएको देखिएको छ । 

हेतरामले आफ्ना २५ बर्षीय भाई कृषण चौधरीलाई बन रक्षक बनाइदिन अनुरोध गर्दै मन्त्रीको सम्पर्कमा पुगेका थिए । मन्त्रीले पैसा दिए बन रक्षक बनाईदिने आस्वासन दिएपछि हेतरामले मन्त्रीले भनेअनुसारको रकम दिएको दाबी गर्छन् । 

हेतरामले मन्त्री यादवको खातामा पटक- पटक गरि साढे दुईलाख बढी रकम दिएको छन् । सोही रकम पठाएको भौचारपनि उनीसंग सुरक्षित छ । बाँकी डेढ लाख भने बुटवलस्थित मन्त्री निवासमै बुझाएको हेतरामको दावी छ । 

तत्कालिन मुख्यमन्त्री शंकर पोखरेलले यादवलाई मन्त्री नियुक्त गरेका थिए । यद्यपी तत्कालिन अबस्थामा यादव प्रदेश सांसद थिएनन् । उनी मन्त्री भएको  तीन महिनापछि प्रदेश लोकसेवा आयोगले १०६ जना बन रक्षकको विज्ञापन खोलेको थियो । त्यही पदमा चौधरीलाई जागिर लगाईदिने नाममा तत्कालिन मन्त्री यादवले पैसा लिएपनि नाम ननिकालिदिएको चौधरीको गुनासो छ ।

चौधरी भन्छन् “भाईको नाम ननिस्किएको अवसथमा तुलसीपुर उपमहानगरपालिका वडा नं. १८ दुधरासका सोम जनैदार भेटिए । जनैदारले मन्त्रीसंग चिनजान भएकाले भनसुन गरेर भएपनि बैकल्पिकमा नाम निकालिदिने आश्सावन दिए र, मन्त्रीसंग पनि भेटाईदिए ।” चौधरीका अनुसार मन्त्रीले बैकल्पिकमा नाम निकाल्दिने कुरामा ढुक्का हुन भन्दै घर पठाए र केही मोवाईल नम्बरहरु पनि दिएर फोन गर्न भने ।

साहुसंग ऋण लिएर हेतरामले मन्त्रीलाई पैसा पठाएका थिए । मिस्त्री काम गर्ने चौधरीको आफ्नो नाममा एक टुक्रा जग्गा छैन । हाल उनी ऐलानी जग्गामा बसोबास गर्दै आएका छन् । मन्त्रीलाई दिन खोजेको ऋणको भारीले अहिले हेतरामको परिवारनै भाँडिएको छ । 

यो विषयमा प्रतिक्रिया लिन खोज्दा पूर्वमन्त्री यादव सम्पर्कमा आउन सकेनन् । 

पुर्व मन्त्री यादव ३१ असारमा मात्रै बैकिङ कसुरमा बाँकेबाट पक्राउ परेका थिए । रुपन्देहीको सियारी गाउँपालिका वडा नं. १ का उमाशंकर यादवको १२ लाख २८ हजार रुपैँया फिर्ता नदिएको र दिएको चेक नसाटिएको भन्दै उनी विरुद्ध बैकिंङ कसुर सम्बन्धि मुद्दा परेको थियो । यादवले सोही बराबरको रकम दिएपछि मंगलबार रिहा भएका थिए ।  

यादव गएको मंसिरमा भएको निर्वाचनमा बाँकेको २ (क) बाट एमालेका उम्मेदवार बनेका थिए । उनी जसपाका भण्डारीलाल यादवसंग पराजित भएका थिए ।