चिकित्सकले काटेको विमानका टिकट पूर्वमुख्यमन्त्री शाहीको टोलीले 'हाइज्याक' गरेपछि

मुगुको ताल्चा विमानस्थलबाट नेपालगञ्ज आउन लागेको समिट एयरमा चिकित्सकहरूको सिट पूर्वमुख्यमन्त्री सहित माओवादी नेताहरूले 'हाइज्याक' गरेका छन् ।

Watch On

२ साता अघिनै दुईतर्फी टिकट काटेका चिकित्सकहरूको टिकटमा माओवादी केन्द्रका नेताहरू उडेपछि १६ जना चिकित्सक मुगुमा अलपत्र परेका छन् ।

कर्णाली प्रदेशका पूर्वमुख्यमन्त्री महेन्द्रबहादुर शाही सहित नेकपा माओवादी केन्द्रका उपमहासचिव मात्रिका यादव, प्रदेश अध्यक्ष विमला केसी, धर्मराज शाह र प्रकाशबहादुर शाही चिकित्सकहरूले काटेको टिकटको सिटमा नेपालगञ्ज आएका हुन् ।

ताल्चामा अलपत्र परेको चिकित्सकहरूका अनुसार समिट एयरका स्टेसन म्यानेजर महेन्द्र भामले भिआइपीको लागि सिट जरूरी परेकाले पाँच जना चिकित्सकलाई लैजान नसकिने भन्दै विमानस्थलबाट फर्काएका थिए । कर्णाली स्वास्थ्य विज्ञान प्रतिष्ठानमा मेरुदण्डसम्बन्धी गोष्ठी र अन्तरक्रियाका लागि जुम्ला पुगेको चिकित्सकको टोलीले दुई साता अघिनै १६ जनाको आउनेजाने टिकट काटेका थिए ।

समिट एयरको बेइमानीका कारण ५ जनालाई विमानस्थलमै छोडेर उड्नु पर्ने भएपछि सबै चिकित्सकले उड्न मानेनन् । नेपालगञ्ज विमानस्थलका श्रोतका अनुसार पूर्वमुख्यमन्त्री महेन्द्रबहादुर शाहीले दोलखा जाने कार्यक्रम छ भनेपछि चिकित्सकहरूको सिटमा माओवादी नेताहरूलाई उडाइएको हो ।