आन्दोलनरत डाक्टर र सरकारबीच सहमति

७ असाेज, काठमाडाैँ : देशभरका स्वास्थ्यकर्मीहरुमाथि आक्रमणमा संलग्नहरुमाथि कारबाही हुनुपर्ने मागसहित आन्दोलनरत चिकित्सक र सरकारबीच सहमति भएको छ । 

Watch On

आक्रमणमा संलग्नलाई स्वास्थ्यकर्मी तथा स्वास्थ्य संस्थाको सुरक्षासम्बन्धी ऐन २०६६ अनुसार कारबाही गर्ने विषयमा सहमति भएको हो ।

मंगलबार गृह मन्त्रालयमा उपप्रधान तथा गृहमन्त्री नारायणकाजी श्रेष्ठको नेतृत्वमा भएको वार्तामा हरेक स्वास्थ्य संस्थामा उपचारबारे गुनासो राख्ने उजुरी पेटिकाकाे व्यवस्था गर्ने, त्यस्तै कानुन विपरित गर्नेलाई कारबाही हुने सूचना राख्ने निर्णय भएको हो । 

मंगलबार दिउँसो ३ बजेबाट सुरु भएको वार्तामा गृहमन्त्री नारायणकाजी श्रेष्ठ, स्वास्थ्यमन्त्री मोहन बस्नेत, स्वास्थ्यमन्त्रालयका अधिकारी, स्वास्थ्यकर्मी ट्रेड युनियन, मेडिकल काउन्सिल, चिकित्सक संघका प्रतिनिधि उपस्थित थिए । 

स्वास्थ्यकर्मीमाथि भएको आक्रमणविरुद्ध चिकित्सकहहरु काठमाडौँको माइतिघर लगायत देशका विभिन्न स्थानमा प्रदर्शनमा उत्रिएका थिए । उनीहरूले दोषीलाई खुल्ला छुट डाक्टरमाथि बुटैबुट, अस्पतालमा नआउ डाक्टर बिरामीको दुवैको ज्यान बचाउ, डाक्टर कुट्न पाइँदैन, पेशा छोडौँ कि देश छोडौँ ? लगायतका प्लेकार्ड बोकेर नाराबाजी गरेका थिए । 

लम्जुङकी एक महिलाको उपचारको क्रममा मणिपाल शिक्षण अस्पतालमा मंगलबार मृत्यु भएको थियो । मृतकका आफन्तसहितको भीडले डाक्टरले लापरवाही गरेको भन्दै हातपात गरेका थिए । उक्त घटनाले मणिपाल अस्पताल परिसरसमेत तनावपूर्ण भएको थियो ।