काठमाडौँ । पशुपतिको गौशाला धर्मशाला खाली गराउन नगर प्रहरीलाई चौथो पटक पनि अवरोध भएको छ । बुधबार धर्मशाला क्षेत्रमा पुगेको नगर प्रहरीलाई नेपाल प्रहरीले अवरोध गरेको महानगर प्रहरी बलले जनाएको छ। महानगर प्रहरी बलका प्रमुख प्रहरी उपरीक्षक राजुनाथ पाण्डेले धर्मशाला खाली गराउन आएको टोलीमाथि प्रहरीले अवरोध गरेको बताए । 

‘हामी चौथो पटक आज पुनः यहाँ आएका छौँ,’ पाण्डेले सिधाकुरासँग भने,‘ हामीलाई पुनः अवरोध भएको छ । नेपाल प्रहरीले धर्मशाला खाली गराउन दिएको छैन् । हामी बोर्ड राख्दैछौँ ।’ धर्मशाला खाली गराउन लागि परेको महानगरलाई पटक पटक अवरोध भएको र अहिले पनि विवाद भएको उपरीक्षक पाण्डेले सिधाकुरालाई बताए । महानगरेको टोली २ वटा डोजर लिएर धर्मशाला खाली गराउन पुगेको थियो । उक्त डोजर गौशाला प्रहरी वृत्तको टोलीले नियन्त्रणमा लिएको छ । 

मारबाडी सेवा समितिले सञ्चालन गरिरहेको पशुपतिनाथ क्षेत्रको गौशाला धर्मशाला पशुपति क्षेत्र विकास कोषको भएको अदालतको फैसलासँगै कोष र महानगरबीच धर्मशाला व्यवस्थापनको समझदारी भएको थियो । सोही समझदारीअनुसार कोषले धर्मशाला व्यवस्थापनका लागि समितिबाट खाली गराउन सहयोगका लागि महानगरलाई पत्राचार गरेको थियो । 

कोषको पत्र पछि महानगरले धर्मशालाबाट मारवाडी सेवा समितिलाई हटाउन प्रयास गरिरहेको छ । तर, माथिको आदेश भन्दै नेपाल प्रहरीले महानगर प्रहरीलाई पटक पटक अवरोध गरिरहेको छ ।