इजरायलमा चुनाव : बहुमत गुमाएपछि नेतन्याहु भन्छन्, धाँधली भयो, छानविन गरियोस्

जेरुसेलम । इजरायलमा गत मंगलबार भएको निर्वाचनको नतिजा लगभग सार्वजनिक भइसकेको छ। यसमा नेतान्याहुको लिकुड पार्टीको गठबन्धनले बहुमत प्राप्त गर्न सकेन।

Watch On

इजरायली प्रधानमन्त्री बेन्जामिन नेतान्याहुले आफ्नो गठबन्धन बहुमतबाट टाढा रहनुमा अरब पार्टीहरूलाई दोषी ठहराएका छन्।

उनले एक्स (ट्विटर) मा आफ्नो पार्टीको एक बयान जारी गर्दै भनेका छन्, 'इजरायलमा चुनाव अरब पार्टीहरूले चोरेका हुन्, जसले आतंकवादको समर्थन गर्छन् र यहुदी राज्यलाई समाप्त पार्न चाहन्छन्। यो चोरी घुसखोरी, धम्की, हिंसा, किर्ते (जालसाजी) र मतदाताहरूलाई आकर्षित गर्न प्रतिबन्धित सफ्टवेयरको प्रयोग जस्ता गम्भीर आपराधिक कार्यहरू मार्फत गरिएको हो।'

नेतन्याहुले चुनावमा धाँधलीसँग जोडिएका सयौँ बयान र प्रमाणहरू आफ्नो पार्टीले प्रहरी, शिन बेट र केन्द्रीय निर्वाचन समितिलाई बुझाउन लागेको पनि उल्लेख गरेका छन् । 'यी प्रमाणहरू धेरै अरब मतदान केन्द्रहरूमा भएका चुनाव धाँधलीसँग सम्बन्धित छन्। यसमा रा'म पार्टीका पर्चा र नगद भएका हजारौँ खामहरू, मतदान केन्द्रका सदस्यहरूलाई धम्की दिने र उनीहरूमाथि हिंसा गर्ने, मतदान कक्षको पर्दा पछाडि धेरै पटक भोट हाल्ने, दोहोरो पहिचानका साथ मतदान गर्ने, खामको सङ्ख्या र मतदाताको सङ्ख्यामा भिन्नता, मतदाताहरूलाई परिचालन गर्न प्रतिबन्धित सफ्टवेयरको प्रयोग लगायतका धेरै अन्य मामिलाहरू समावेश छन्,' उनले भने । 

नेतन्याहुले अरब पार्टीहरूको तर्फबाट चुनावमा गरिएको धाँधलीको गहिरो छानबिन गर्न र यसमा संलग्न अपराधीहरू विरुद्ध पूर्ण कानुनी कारबाही गर्न प्रहरी र शिन बेट (विशेष सुरक्षा निकाय) सँग माग गरेका छन् । 

'हामी केन्द्रीय निर्वाचन समितिसँग माग गर्दछौँ कि उसले यी आपराधिक कार्यहरूको जाँचका लागि तत्काल कदम चालोस् । यी कार्यहरूले इजरायलमा चुनावको निष्पक्षता र चुनावी नतिजालाई गम्भीर क्षति पुर्‍याएका छन् ।'

९७ प्रतिशत मतगणना भइसक्दा नेतान्याहुको गठबन्धनको पक्षमा ५३ सिट, उनका विरोधी आइजनकोटको नेतृत्वमा रहेको गठबन्धनलाई ४८ सिट र अरब पार्टीहरूको गठबन्धनलाई १९ सिट मिलेको छ ।

१२० सदस्यीय इजरायली संसदमा बहुमतका लागि ६१ सिट आवश्यक पर्छ ।