आज यी क्षेत्रमा हिमपात र वर्षाको सम्भावना

काठमाडौं । बंगालको खाडीमा विकसित चक्रवात ‘अर्नब’को प्रभाव आज (बिहीबार) देखि नेपालमा पर्ने भएको छ। यसको प्रभावले देशका विभिन्न प्रदेशमा वर्षा तथा हिमाली क्षेत्रमा हिमपातको सम्भावना रहेको जल तथा मौसम विज्ञान विभागअन्तर्गत मौसम पूर्वानुमान महाशाखाले जनाएको छ।

Watch On

विभागका अनुसार कोशी र बागमती प्रदेशका हिमाली भूभागका केही स्थानमा तथा बाँकी प्रदेशका हिमाली भूभागका थोरै स्थानमा मध्यमसम्मको वर्षा र हिमपात हुन सक्नेछ।

मधेश प्रदेशसहित कोशी र बागमती प्रदेशका पहाडी तथा तराई भूभागका थोरै स्थानमा वर्षाको सम्भावना छ। त्यस्तै, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा पनि मध्यमसम्मको वर्षा हुन सक्ने विभागको पूर्वानुमान छ।

आज कोशी, मधेश, बागमती र गण्डकी प्रदेशका अधिकांश भूभागमा साधारणतया बादल लाग्नेछ। कर्णाली र सुदूरपश्चिम प्रदेशका हिमाली भूभागमा पनि साधारणतया बादल लाग्नेछ भने बाँकी भूभागमा आंशिक बदली रहनेछ।

मौसम विश्लेषण

विभागका अनुसार हाल देशमा पश्चिमी वायुको आंशिक प्रभाव रहेको छ। यसैबीच, बिहीबारदेखि बंगालको खाडीमा विकसित चक्रवात ‘अर्नब’को प्रभावसमेत नेपालमा पर्ने पूर्वानुमान गरिएको छ।

मौसममा हुने परिवर्तनका कारण वर्षा र हिमपातको सम्भावना रहेकाले यात्रा तथा हिमाली क्षेत्रमा गतिविधि गर्नेहरूले मौसमसम्बन्धी अद्यावधिक सूचना हेरेर सावधानी अपनाउनुपर्नेछ।