पोखरा विश्वविद्यालय, व्यवस्थापन अध्ययन सङ्कायको स्नातक र स्नातकोत्तर तहमा नयाँ पाठ्यक्रमहरू लागू

काठमाडाै । पोखरा विश्वविद्यालय, व्यवस्थापन अध्ययन सङ्काय अन्तर्गत सञ्चालित शैक्षिक कार्यक्रमहरूको पाठ्यक्रम परिमार्जन गरेको छ । स्नातक तहमा बिबिए, बिबिए (फाइनान्स) र बिबिए (ट्राभल एण्ड टुरिज्म) र स्नातकोत्तर तहमा एमबीए, एमबीए (फाइनान्स) र एमबीए (ग्लोबल बिजनेस) का पाठ्यक्रमहरू परिमार्जित गरेको विश्वविद्यालयले जनाएको छ।

परिमार्जित पाठ्यक्रम यसै शैक्षिक सत्र २०२४ फलबाट लागू हुनेछ। विद्यमान बद्लिँदो विश्व परिवेश , आर्थिक, सामाजिक, व्यावसायिक र प्राविधिक गतिविधिहरूलाई मध्यनजर गर्दै वर्तमान र आगामी केही वर्षमा नेपाल लगायत विश्व जगत्मा व्यवस्थापन, व्यापार, उद्यमशीलता र अन्य व्यवसायीहरूको लागि दक्ष मानव संसाधन उत्पादन गर्न नयाँ कार्यक्रमहरूको मुख्य उद्देश्य रहेको विश्व विद्यालय जनाएको छ । 

हाल लागू गरिएका स्नातक तहका पाठ्यक्रमहरूमा प्रत्येक सेमेष्टरमा प्रयोगात्मक र व्यावहारिक ज्ञानको लागि प्राक्टिकल कोर्षहरु, प्रोजेक्ट वर्क र कम्युनिटी इङ्गेजमेन्ट प्रोजेक्ट जस्ता कोर्षहरु समावेश गरिएको छन्।

अन्तिम आठौँ सेमेष्टरमा इन्टर्नसिप राखिएको छ र सो सेमेष्टरमा कलेजमा हाजिर हुनेगरि कुनै पनि कोर्ष राखिएको छैन् । यसरी कलेज आउनु नपर्ने हुँदा सातौँ सेमेस्टर पछि विद्यार्थीहरू इन्टर्नसिप सहित रोजगारीमा वा व्यवसायमा आवद्ध हुन सक्छन् । साथै इन्टर्नसिपको लागि आफू अध्ययन गरिरहेको कलेज भन्दा अन्य टाढाको स्थान तथा विदेशमा समेत गई अनुभव लिन सक्छन्।