काठमाडौँमा रवि लामिछानेको बयान : ६० प्रश्नको सवाल जवाफ सकियो, सोमबार रुजु

काठमाडौँ। राष्ट्रिय स्वतन्त्र पार्टी (रास्वपा) का सभापति रवि लामिछानेको काठमाडौँको बयान लगभग सकिएको सरकारी अधिकारीहरुले बताएका छन् ।

Watch On

जिल्ला सरकारी वकिल कार्यालय काठमाडौँमा दुई दिन देखि जारी बयानका क्रममा लामिछानेमाथि कालीमाटीको स्वर्णलक्ष्मी सहकारीसँग सम्बन्धित रहेर ६० वटा प्रश्न सोधिएको स्रोतले बतायो । ‘लगभग बयान सकियो । ६० प्रश्नको लिखित जवाफ लगभग सकिएको छ,’ स्रोतले भन्यो,‘भोली उहाँले बयानको रुजु गर्नुहुनेछ र प्रमाणिकरण हुनेछ ।’  

काठमाडौँको कालीमाटीमा रहेको स्वर्णलक्ष्मी सहकारीको बचत अपचलनमा अनुसन्धान गर्न बिहिबार काठमाडौँ ल्याइएका उनीसँग शुक्रबार र आइतबार बयान लिइएको हो । 

शुक्रबार करिब ६ घण्टा लामिछानेको बयान लिइएको थियो । आइतबार करिब ७ घण्टाको निरन्तर बयानपछि बयान अन्तिम चरणमा पुगेको हो ।

लामिछानेलाई सहकारी ठगी आरोपमा अनुसन्धान गर्न कात्तिक २ गते काठमाडौँबाट पक्राउ गरी पोखरा लगिएको थियो । त्यसपछि उनीविरुद्ध संगठित अपराध र सम्पत्ति सुद्धिकरणमा समेत अनुसन्धान भईरहेको छ । 

उनलाई कास्की जिल्ला अदालतले ५ पटक म्याद थप गरिसकेको छ । यो बिचमा उनीविरुद्ध रुपन्देही, चितवन र काठमाडौँबाट पनि पक्राउपुर्जी जारी भएको छ । उनलाई रुपन्देही लगेर बयान गराईसकिएको छ भने अहिले काठमाडौँमा बयानका लागि ल्याइएको छ । लामिछानेलाई काठमाडौंबाट पोखरा फर्काइने र त्यहाँबाट चितवन लैजाने तयारी छ ।