चितवन पुर्याइएका रविको बयान जारी

काठमाडाैँ । सहकारी रकम अपचलनको मुद्दामा बयान लिनका लागि चितवन पुर्याइएका राष्ट्रिय स्वतन्त्र पार्टीका सभापति रवि लामिछानेको बयान जारी छ । मंगलबार बिहान चितवन पुर्याएका उनको बयान जिल्ला सरकारी वकिल कार्यालयमा भइरहेको चितवन प्रहरीले जनाएको छ ।

Watch On

सहकारी रकम बचत अपचलनमा अनुसन्धान गर्न कात्तिक २ गते पक्राउ परेका लामिछानेलाई चितवनमा साहारा सहकारीको रकम अपचलनको अनुसन्धान गर्न चितवन लगिएको हो । 

चितवनमा लामिछानेलाई जुन सहकारीको अनुसन्धान गर्न लगियो सो सहकारीबाट ४२ करोड रकम पाँचवटा कम्पनीमा गएको देखिएको प्रहरीले जनाएको छ । हिनामिना भएको रकम मध्ये रु १० करोड ८० लाख गोर्खा मिडिया नेट्वर्कमा गएको देखिएको प्रहरी अनुसन्धानले जनाएको छ ।

लामिछानेलाई चितवन पुराउदा सुरक्षाका लागि भरतपुर विमानस्थलमा ठूलो संख्यामा सुरक्षाकर्मी परिचालन गरिएको थियो भने रविका समर्थकहरु विमानस्थल बाहिर पुगेर नाराबाजी गरेपछि प्रहरी र रविका समर्थकबीच धकेलाधकेल समेत भएको थियो । चितवन साहारा सहकारीको रकम अपचलनको विषयमा पीडितहरुले पछिल्लो पटक मंसिर ५ गते रास्वपा सभापति लामिछानेसहित १० जना विरुद्ध पुरक जाहेरी दिएका थिए । मंसिर ७ गते चितवनमा रविविरुद्ध पक्राउ पुर्जी जारी गरिएको थियो ।

लामिछानेलाई सहकारी ठगी आरोपमा अनुसन्धान गर्न कात्तिक २ गते काठमाडौँबाट पक्राउ गरी पोखरा लगिएको थियो । त्यसपछि उनीविरुद्ध संगठित अपराध र सम्पत्ति सुद्धिकरणमा समेत अनुसन्धान भईरहेको छ । 

उनलाई कास्की जिल्ला अदालतले ५ पटक म्याद थप गरिसकेको छ । यो बिचमा उनीविरुद्ध रुपन्देही, चितवन र काठमाडौँबाट पनि पक्राउपुर्जी जारी भएको छ । उनलाई रुपन्देही र काठमाडौँ लगेर बयान गराईसकिएको छ भने अहिले चितवनमा बयानका लागि लगिएको छ ।