सूर्यदर्शन सहकारी प्रकरणमा रविसहित ७ जनाकै बयान सकियाे, थुनछेक बहस सुरु

काठमाडाैँ । पोखराको सूर्यदर्शन सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेसहित सातै जना प्रतिवादीको बयान सकिएको छ । जिल्ला अदालत कास्कीका न्यायाधीश नीतिज राईको इजलासमा गत ८ गतेदेखि सुरु भएको बयान मंगलबार सकिएको हो । 

Watch On

सात जना प्रतिवादीको बयान सकिएसँगै आजैबाट थुनछेक बहस सुरु भएको कास्की अदालतले जनाएको छ । अदालतमा प्रतिवादी पूर्वडिआईजी छविलाल जोशी, लीला पछाईं, रवि लामिछाने, पूर्वसांसद मीना गुरुङ, रामबहादुर खनाल, कृष्णबहादुर गुरुङ र आरती गुरुङको बयान लिइएको हो । उनीहरुको बयान सकिएसँगै थुनछेक बहस सकिएको छ । 

गत पुस ७ गते जिल्ला सरकारी वकिलको कार्यालय, कास्कीले सहकारीको रकम अपचलनको आरोपमा रास्वपा सभापति लामिछानेसहित ४४ जनाविरुद्ध मुद्दा दायर गरेको थियो । लामिछानेमाथि सहकारी ठगीसँगै सङ्गठित अपराध र सम्पत्ति शुद्धिकरण कसुरमासमेत मुद्दा दायर भएको छ । 

सरकारी वकिलको कार्यालयले सूर्यदर्शन सहकारीको रकम ठगी प्रकरणमा अहिलेसम्म ६३ जनाविरुद्ध जिल्ला अदालत कास्कीमा मुद्दा दायर गरिएको जनाएको छ । लामिछानेसहित १९ जनाविरुद्ध सङ्गठित अपराधमासमेत मुद्दा चलाइएको छ । यस्तै लामिछानेसँगै खनाल, जोशी र पछाइविरुद्ध सम्पत्ति शुद्धिकरणमा पनि मुद्दा दायर गरिएको सरकारी वकिलको कार्यालयले जनाएको छ ।