कोशी प्रदेशको मुख्यमन्त्री कार्की कि आङ्बो, अन्याैलमा प्रदेश प्रमुख ?

कोशी प्रदेशको  लागि मुख्यमन्त्रीमा दाबी पेश गर्ने समय आज साँझ ५ सकिदै छ  ।

Watch On

प्रदेश प्रमुख पर्शुराम खापुङले संविधानको धारा १६८ (५) अन्तर्गत मुख्यमन्त्रीका लागि आह्वान गरेको समय साँझ ५ बजे सकिने छ ।

अहिलेसम्म प्रदेशसभा सदस्यद्वय माओवादी केन्द्रका इन्द्र आङ्बो र कांग्रेसका केदार कार्कीले दाबी पेस गरेका छन् । दुबै जनाले आफ्नो पक्षमा रहेका भन्दै ४७/४७ जना सांसदको हस्ताक्षर बुझाएका छन् ।

संविधानको उपधारा ५ मा जोसुकै सांसदले पनि बहुमत सांसद पुर्‍याउन सके आफ्नो नेतृत्वमा सरकार गठन गर्नसक्ने व्यवस्था छ । तर दुबै उमेदवारले बराबर सांसदको हस्ताक्षर बुझाएपछि प्रदेश प्रमुख अन्योलमा परेका छन् । उसो त केही सांसदको दुबै जनाले पेश गरेको सूचीमा हस्ताक्षर छ ।

यो अवस्थामा प्रदेश प्रमुख खापुङले सबै सांसदलाई बोलाएर हस्ताक्षर सनाखत गराउने पर्नेछ ।

अहिले प्रमुख खापुङ दुबै दाबेदारीका विषयमा कानुनी छलफलमा रहेको प्रमुखको सचिवालयले जनाएको छ ।संम्भवत साँझ ५ बजे पछि मात्रै मुख्यमन्त्री नियुक्त गर्ने छन् । बिहीबार मात्र सत्तागठबन्धन नेताहरूले कोशीको मुख्यमन्त्रीमा माओवादी केन्द्रका इन्द्र आङ्बोलाई बनाउने निर्णय गरेका थिए ।

तर कांग्रेसको शेखर कोइराला पक्षले भने आङ्बोलाई समर्थन गर्न नसकिने भन्दै एमालेका ३९ सांसदको समर्थन लिएर केदार कार्कीलाई मुख्यमन्त्रीमा प्रस्ताव गरे । कोशी प्रदेशमा उपसभामुख बाहेक ३९ जना सांसद रहेका छन् । ९३ सदस्यीय कोशी प्रदेश सभामा बहुमतका लागि ४७ सांसद आवश्यक हुन्छ ।

संविधानको धारा १६८ को उपधारा ५ बमोजिम सरकार गठनका लागि हस्ताक्षर गर्दा सांसदलाई ह्वीप नलाग्ने र स्वतन्त्र हैसियत रहने सर्वोच्च अदालतको व्याख्या छ ।