गैह्रीगाउँ हत्या प्रकरण : अभियुक्त सञ्जय भण्डारीलाई पुर्पक्षका लागि कारागार चलान

काठमाडौँ : काठमाडौँको गैह्रीगाउँस्थित दिव्य सःमिलमा चार जनाको हत्या अभियोग लागेका २३ वर्षीय सञ्जय भण्डारी पुर्पक्षका लागि कारागार चलान भएका छन् ।

Watch On

सिन्धुपाल्चोक बाह्रबीसे नगरपालिका ९ का भण्डारीलाई शुक्रबार काठमाडौँ जिल्ला अदालतले पुर्पक्षका लाथि कारागार चलान गर्न आदेश दिएको हो।

प्रहरीले रायसहितको प्रतिवेदन पेस गरेपछि सामूहिक हत्या प्रकरणका अभियुक्त भण्डारीविरुद्ध शुक्रबार नै सरकारी वकिलको कार्यलयले मुद्दा दायर गरेको थियो । उनीमाथि सरकारी वकिलको कार्यालयले आजीवन काराबासको मागदाबीसहित मुद्धा दर्ता गरेको हो ।

भण्डारीले गत भदौ २९ गते काठमाडौँको गैह्रीगाउँस्थित दिव्य सःमिलमा भएको ४ जनाको सामूहिक हत्या प्रकरणमा संलग्न भएको आरोपमा पक्राउ परेका थिए । उनले उक्त फर्निचरमा कार्यरत दोलखाका ५६ वर्षीय कुमार भुजेल, उनकी श्रीमती ५० वर्षीया अम्बिका भुजेल, आमा ७६ वर्षीया सुभद्रा भुजेल र धनकुटाका १९ वर्षीय विशाल राईको हत्या गरेको प्रहरीको अनुसन्धानले देखाएको छ । 

उनलाई घटना भएको दुई दिनपछि सिसिटिभीको सहायताले भदौ ३१ गते काठमाडौँ प्रहरी परिसरले पक्राउ गरेर अनुसन्धान गरेको थियो ।

बयानका क्रममा उनले नवीन राई भन्ने विशाल राईसँग आफ्नो रिसइबी रहेको र उनलाई धारिलो हतियार खुकुरी प्रहार गरी हत्या गरेको साथै अन्यलाई घटना बाहिरिने डरले हत्या गरेको बताएका छन् ।