जनताकाे साथ छ भन्ने भ्रम भए पार्टी खोलेर मैदानमा आउन पूर्वराजालाई माधव नेपालकाे चुनाैती

भक्तपुर : नेकपा एकीकृत समाजवादीका अध्यक्ष माधवकुमार नेपालले पूर्वराजालाई ज्ञानेन्द्र शाहलाई राजनीतिक दल खोलेर चुनावमा आउन चुनौती दिएका छन् । 

Watch On

पछिल्ला दिनहरु राजानिकट युवाहरुले देशव्यापी रुपमा राजा आउ देश बचाउ भन्दै नाराबाजी गर्ने गरेको साथै पूर्वराजा पनि अन्य दलका नेताहरुलाई गाली गर्दै हिँडेको कुरालाई इङ्गित गर्दै उनले बुधबार भक्तपुरमा आयोजित एक कार्यक्रममा राजाप्रति आक्रोश व्यक्त गरेका हुन् । 

 उनले पूर्वराजा ज्ञानेन्द्र शाहलाई वंशको शासन नेपाली जनतालाई स्वीकार्य नहुने बताउँदै हिम्मत, शाहस अनि जनताको साथ छ भन्ने भ्रम भए राजनीतिक दल खोलेर मैदानमा आउन चुनौती दिएका छन् । 

‘असल काम गरेको छु, त्याग तपस्या र बलिदान गरेको छु भन्ने लागेको छ भने आए हुन्छ । दुःख उठाउन कहिले जानेको छैन, सुखमा जन्मियो, हुर्कियो, अनि जनतालाई भ्रममा राख्ने कोशिस सफल हुनेछैन’, अध्यक्ष नेपालले भने, ‘कुनै वंशको शासन नेपालमा नेपाली जनतालाई स्वीकार्य छैन । भक्तपुरमा यो आवाज अझै गुञ्जाउनुपर्छ, किनभने भक्तपुरबाट नै संकेत दिन खोजियो । झापाले त्यो आवाज उठाउनुपर्छ, झापाले नि संकेत दिन खोज्यो । अस्ति भएको निर्वाचन आफैँमा जनमत संग्रह हो । जनताले सीधै पार्टीलाई विश्वास गरेका छौं भन्ने देखाए ।’

त्यस्तै उनले विगतमा राजाहरुले गरेको प्रतिगमन पुन नेपाली जनतालाई स्वीकार्य नहुने र त्यसप्रति नेपाली जनता सचेत हुनुपर्ने बताए । उनले भने,‘ ‘विगतमा उनीहरूले कसरी यो मुलुक चलाएका थिए, तिनीहरूका पनि हामीलाई एकएक कुराहरू सबै थाहा छ । त्यसो हुनाले संविधानलाई मास्न खोज्ने, प्रतिगमनको दिशामा लैजान खोज्ने, पुरानै अवस्थामा यो देशलाई फर्काउन खोज्ने त्यस्ता तत्वप्रति सबै होशियार हुनुपर्छ ।