म जिल्ला जाँदा एमालेलाई सोध्नुपर्दैनः पूर्वराष्ट्रपति भण्डारी

विराटनगर । पूर्वराष्ट्रपति विद्यादेवी भण्डारीले आफू देशका विभिन्न जिल्लामा जाँदा नेकपा एमालेसँग अनुमति लिनुपर्ने कुनै आवश्यकता नरहेको बताएकी छिन् । सोमबार बिहान विराटनगर विमानस्थलमा सञ्चारकर्मीहरूसँग कुराकानी गर्दै भण्डारीले आफू देशको पूर्वराष्ट्रपति र पहिलेदेखि नै एमालेसँग आबद्ध भएर काम गरेका कारण जिल्ला जिल्लामा गएर संवाद गर्न एमालेको अनुमति लिनुनपर्ने बताएकी हुन् । 

जनताका आकांक्षा बुझ्न र कार्यक्रमहरुमा सहभागि हुन एमालेको अनुमति मागिरहनुनपर्ने उनको भनाई छ । ‘म देशको पूर्वराष्ट्रपति हुँ, पार्टीको संगठित सदस्य भएर मात्रै होइन, धेरै पहिलेदेखि एमालेसँग आबद्ध छु। अब समाजसँग संवाद गर्न, जनताको आकांक्षा बुझ्न र देशका विभिन्न भागमा कार्यक्रमहरूमा सहभागी हुन एमालेसँग अनुमति मागिरहनु आवश्यक छैन।’, भण्डारीको भनाई थियो । 

त्यस्तै चीन भ्रमणपछि झापा आएका बेला एमालेको कार्यक्रममै देखिएपछि उनी सक्रिय राजनीतिमा फर्किन लागेको अड्कलबारे सोधिएको प्रश्नमा उनले आफू जन्मेदेखि नै एमाले भएको र एमालेभन्दा फरक कुरा सोच्ने कुरा नभएको बताइन् । ‘म त्यस्तो व्यक्ति परेँ कि म जहाँ जन्मे, हुर्कें र यो स्थानमा पुगेँ । त्यो समाजबाट आजको मितिसम्म आउँदाखेरि एउटै लाइनमा म छु । तपाईंहरुले यसो हेर्नुभयो भने बुझ्नु हुन्छ । पहिलेदेखि नै वामपन्थी आन्दोलनमा लागियो ।’, उनले थपिन्, ‘पार्टीगत रुपमा हेर्दाखेरि त म जुन पार्टीबाट जन्में, हुर्कें र यो स्थानमा पुगें । त्योभन्दा फरक त सोच्न सकिने कुरा भएन ।’

नेकपा एमाले अध्यक्ष केपी शर्मा ओलीले पछिल्ला दिनमा पार्टीभित्र गुटबन्दीको चर्चा गरेका सन्दर्भमा भण्डारीले अध्यक्षले आफूमाथि इंगित गरेजस्तो लाग्दैन भन्ने जवाफ दिएकी छिन् । उनले भनिन्, ‘नेकपा एमालेको वर्तमान अध्यक्ष ज्यू केपी शर्मा ओली ज्यूले मलाई नै तोकेरै, ताकेरै भन्नु भयो होला भन्ने त लाग्दैन ।’

पूर्वराष्ट्रपति भण्डारीले तत्कालका  लागि वाम एकता सम्भव नभएको बताइन् । ‘म वाम एकता भइहाल्ला भन्ने कुरामा त्यति आश्वस्त छैन किनकी विश्वासको ठूलो संकट छ पार्टी–पार्टीहरुको बिचमा ।’, भण्डारीले भनिन् । 
त्यस्तै उनले राष्ट्रिय एजेण्डामा दलहरूबीच सहकार्यको खाँचो औंल्याउँदै, वामपन्थी मात्रै नभई सबै जिम्मेवार दलहरूले छलफलमार्फत राष्ट्रिय हितका विषयमा सहमति बनाउनु आवश्यक रहेको बताइन्।