दाङ । प्रतिनिधि सभा सदस्य तथा नेकपा (एकीकृत समाजवादी)का उपमहासचिव मेटमणि चौधरीविरुद्ध चेक अनादरको जाहेरी परेको छ।

बुधबार जिल्ला प्रहरी कार्यालय दाङमा हुलाकमार्फत चेक अनादर सम्बन्धी जाहेरी परेपछि यसबारे छलफल भइरहेको कार्यालय प्रमुख प्रहरी उपरीक्षक (एसपी) अर्जुनप्रसाद तिमिल्सिनाले जानकारी दिए।

‘हुलाकमार्फत चेक अनादरको जाहेरी आएको छ,’ एसपी तिमिल्सिनाले भने, ‘यसबारे हामी छलफलमा छौं।’

लुम्बिनी प्रदेश प्रहरी कार्यालयका अनुसार, चौधरीविरुद्ध एभेरेस्ट बैंकको नाममा काटिएको ५ करोड ४० लाख रुपैयाँ बराबरको चेक बाउन्स भएको भन्दै जाहेरी परेको हो। उक्त जाहेरी रोल्पा निवासी ठेकेदार धात बुढामगरले दिएका हुन्।

चेक बाउन्सको कारण हस्ताक्षर नमिलेको उल्लेख गरिएको छ।

प्रहरीले जाहेरी दिने पक्षलाई सनाखतका लागि कार्यालयमा बोलाएको जनाइएको छ। हुलाकमार्फत परेको जाहेरीलाई सनाखत गर्नका लागि जाहेरवालालाई बोलाउने र त्यसपछि अनुसन्धान नियमित प्रक्रियाअनुसार अघि बढ्ने प्रहरीले जनाएको छ ।

चौधरी २०७९ सालको आम निर्वाचनमा दाङ क्षेत्र नम्बर १ बाट प्रतिनिधिसभा सदस्यमा निर्वाचित भएका थिए। उनले पूर्व सञ्चार तथा सूचना प्रविधि मन्त्रीको जिम्मेवारी पनि सम्हालेका थिए।