समाज

मलेसियामाथि ९ विकेटको शानदार जित हात पार्दै नेपाल एसीसी यू–१६ इस्ट जोन कपको फाइनलमा

सिधाकुरा

बिहीबार, असार १९, २०८२

मलेसियामाथि ९ विकेटको शानदार जित हात पार्दै नेपाल एसीसी यू–१६ इस्ट जोन कपको फाइनलमा

मलेसिया । नेपाली यू–१६ क्रिकेट टोली एसीसी पुरुष यू–१६ इस्ट जोन कपको फाइनलमा प्रवेश गर्न सफल भएको छ। बिहीबार सेनेङगर टर्फ क्लबमा आयोजित पहिलो सेमिफाइनल खेलमा आयोजक मलेसियालाई ९ विकेटले पराजित गर्दै नेपाल उपाधिनजिक पुगेको हो।

Watch On

मलेसियाले दिएको ९१ रनको झिनो लक्ष्य नेपाली टोलीले मात्र ११.४ ओभरमा १ विकेटको क्षतिमा पूरा गर्‍यो। नेपालको जितमा ओपनर परिमार्जन यादवले विस्फोटक अर्धशतक प्रहार गरे। उनले ३५ बलमा ५ चौका र ५ छक्का सहित ५९ रन बनाए भने श्रीवांस बजगाईं २३ रनमा नटआउट रहे। प्रसिद्ध जैसी २ रनमा आउट भएका थिए।

त्यसअघि टस जितेर पहिले फिल्डिङ रोजेको नेपालले मलेसियालाई ४३.१ ओभरमा ९० रनमै समेट्न सफल भएको थियो। घरेलु टोली मलेसियाका लागि मोहम्मद फाथुल मुइनले सर्वाधिक ३८ रन बनाए भने कप्तान डियाज पात्रोले १० रनको योगदान दिए। अन्य सबै ब्याटर दोहोरो अंकमा पुग्न असफल रहे।

नेपालका लागि अभय यादवले किफायती र घातक बलिङ गर्दै १० ओभरमा १५ रन खर्चेर ४ विकेट लिए। शुभम खनालले १० ओभरमा ४ मेडनसहित १२ रन खर्चेर ३ विकेट हात पारे। कप्तान विपिनप्रसाद शर्मा र सचिन भट्टले समान १–१ विकेट लिए।

नेपाल अब शनिबार हुने फाइनल खेलमा हङकङ र सिंगापुरबीचको दोस्रो सेमिफाइनल विजेतासँग उपाधिका लागि भिड्नेछ।

प्रकाशित मिति: बिहीबार, असार १९, २०८२

प्रतिक्रिया दिनुहोस्