रविको पक्षमा हस्ताक्षर गर्न पुगेका 'गोक्तेकाजी'ले भक्कानिँदै भने, ‘देश र जनताको माया गर्ने नेता तुरुन्तै छुटुन् नाट्यश्वरी’

काठमाडौँ । राष्ट्रिय स्वतन्त्र पार्टीका सभापति रवि लामिछानेविरुद्ध भएको राजनीतिक प्रतिशोधविरुद्धको हस्ताक्षर अभियानमा सहभागी हुन आधा दर्जन बढी कलाकारहरु पुगेका छन् । पार्टीले गैह्रीधारामा राखेको हस्ताक्षर संकलन केन्द्रमा पुगेर उनीहरुले रवि लामिछाने छिट्टै छुटुन् भन्दै हस्ताक्षर गरेका हुन् । 

उक्त अभियानमा सहभागी हुन वरिष्ठ कलाकारहरु रामचन्द अधिकारी (गोक्ते काजी), अशोक शर्मा, राजाराम पौड्याल, किरण केसी (रातामकै), खेम सेन्चुरी, खगेन्द्र लामिछाने, दीपेन्द्र के. खनाल लगायत पुगेका हुन् । 

हस्ताक्षर अभियानमा सहभागी हुन पुगेका रामचन्द अधिकारीले भगवान पुकार्दै सत्य कुराको छानबिन गरेर रवि लामिछाने छिट्टै छुटुन् भन्ने प्रार्थना गरेका छन् । उनले भने, ‘आदरणीय सहकर्मी रवि लामिछानेज्यू, देश र जनताको माया गर्ने नेता तुरुन्तै छुटुन् नाट्यश्वरी । न्यायाधीश, प्रहरी प्रमुखहरु सबैमा सद्बुद्धि आओस् । सत्य कुराको सही छानबिन होस् । उहाँ चाँडै छुट्नुहोस ।’

त्यस्तै रवि लामिछानेले विगतमा समाजसेवा, पत्रकारितामार्फत गरेका नागरिकका हितका काम आफूहरुले नभुलेको र सोही विषयको कदर गर्दै हस्ताक्षर अभियानमा सहभागी भएको कलाकारहरुले बताए । 

रवि लामिछानेमाथि राज्यले गरेको नियोजित आक्रमणविरुद्ध देश–विदेशमा रहेका नेपाली नागरिकको ऐक्यबद्धता प्रदर्शन गर्न, राजनीतिक प्रतिशोध र राज्यले गरेको संगठित अपराधको तथ्यगत चिरफार गर्न, राजनीतिक पूर्वाग्रहका आधारमा गरिने अन्यायपूर्ण कारबाही, धरपकड वा चरित्रहत्याको सशक्त प्रतिवादका लागि जनमनोबल निर्माण गर्न र रवि लामिछानेविरुद्धको मुद्दा–मामिला नयाँ राजनीतिक शक्तिलाई निरुत्साहित गर्ने संस्थागत षड्यन्त्रको सुरुआत हो भन्ने सन्देश जनस्तरमा पुर्याउन भन्दै रास्वपाले हस्ताक्षर अभियान सञ्चालन गरेको छ । 

देशभर एकैसाथ सञ्चालन गरिएको उक्त हस्ताक्षर अभियानमा सहभागी हुन कलाकर्मी, राजनीतिकर्मी, व्यवसायी तथा नागरिकहरुको भिड लाग्ने गरेको छ ।