काठमाडौँ । राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले आज पनि संसद बैठक बहिष्कार गरेका छन् । बैठक सुरु हुनेवित्तिकै दुबै दलका सांसदहरुले उठेर विरोध जनाएका थिए । उनीहरुले भिजिट भिसा प्रकरणको अनुसन्धानका लागि उच्चस्तरीय छानविन समिति गठन हुनुपर्ने माग राख्दै निरन्तर सदनमा विरोध गरिरहेका छन् ।

त्यसपछि सभामुख देवराज घिमिरेले रास्वपाका सांसद मनिष झालाई बोल्नका लागि २ मिनेटको समय दिएका थिए । झाले यो सरकार अझै कति गिर्छ भनेर हेर्न बाँकी रहेको भन्दै सरकार नढलोस् भनेर कामना गरे । सो क्रममा उनले भिजिट भिसा प्रकरणमा आफूहरुको आन्दोलन जारी रहेको बताए । त्यस्तै उनले कुलिङ पिरियडमा कांग्रेसको नेतृत्वमा छानबिन समिति बन्ने विषयमा आपत्ति जनाए ।  

‘जुन दलसँग सम्बन्धित नेतामा औँला उठेको थियो, त्यही दलले त्यसको नेतृत्व नगर्ने भन्ने कुरा एक वर्ष अघि चलेको थियो यो सदनमा । तर आज त्यो अभ्यास बिर्सदै हुनुहुन्छ ।’ झा ले भने, ‘जुन व्यक्तिमाथि औँला उठेको छ, त्यो व्यक्तिको नाम जोडेर नै समितिको नाम बन्नुपर्छ भनेर हप्तौँसम्म तपाईँहरुले बिभिन्न किसिमको प्रपञ्च गर्नुभएको थियो । आज त्यो पनि बिर्सनुभएछ ।’ 

त्यसपछि सभामुख घिमिरेले राप्रपाका सांसद दीपक बहादुर सिंहलाई बोल्ने समय दिए । सिंहले अन्य प्रकरणका छानबिन गर्न बनेको संसदीय छानबिन समितिजस्तै भिजिट भिसा प्रकरणमा पनि समिति बन्नुपर्ने माग राखे ।

उनले भने, ‘सहकारी ठगी प्रकरणको पनि संसदीय छानबिन समिति बन्यो। निजामती विधेयकको जुन पिरियड काण्डको पनि संसदीय छानबिन समिति बन्न गइरहेको छ। आज ४१ दिनभन्दा बढी भइसकेको छ सदन अवरुद्ध भएको । यसरी जबरजस्ती दुई तिहाइको दम्बबाट सदन चलाउनु भएन भन्ने राप्रपाको माग छ । सबैभन्दा ठूलो काण्ड भिजिट भिसामा तलदेखि माथिसम्मका, प्रधानमन्त्रीदेखि तल्लो तहका कर्मचारीहरू मुसिएका छन् । त्यसको दुर्गन्ध आइरहेको छ । संसारभरि नेपालीहरूको बदनामी भइरहेको यत्रो जल्दो बल्दो भिजिट भिसामा किन छानबिन गर्न संसदीय छानबिन समिति गठन गर्नुभएन ’

त्यस्तै उनले उक्त प्रकरणमा छानबिन गर्नका लागि संसदीय छानबिन बन्नुपर्ने र नबनेसम्म आफूहरुले संसद बहिस्कारलाई निरन्तरता दिने बताए । 

त्यसपछि रास्वपा र राप्रपाका सांसदहरुले बैठक बहिष्कार गरी सदनबाट बाहिर निस्किएका थिए ।