मुख्य समाचार

सांसद खतिवडाको प्रश्न : संसद भवनभित्र ड्रोन खस्दा किन जानकारी दिइएन?

सिधाकुरा

बुधबार, असार २५, २०८२

सांसद खतिवडाको प्रश्न : संसद भवनभित्र ड्रोन खस्दा किन जानकारी दिइएन?

काठमाडौँ । सत्तारुढ नेपाली कांग्रेसका सांसद रामहरि खतिवडाले संसद भवन नजिकै ठूलो ड्रोन खसेको दाबी गर्दै सोबारे संसदलाई स्पष्ट जानकारी गराउन माग गरेका छन्।

बुधबार प्रतिनिधिसभाको बैठकको शून्य समयमा बोल्दै खतिवडाले असार २३ गते राति ९ बजेदेखि ९ः३० बजेसम्म संसदको बायाँपट्टी ठूलो ड्रोन खसेको समाचार आएको बताए। उनले सो घटनाबारे आशंका व्यक्त गर्दै प्रश्न गरे, "कहाँबाट आएको थियो? केका लागि आएको थियो? संसदमा आएर खस्दासम्म थाहा पायो कि पाएन?"

उनले यस्तो संवेदनशील विषयमा राज्य संयन्त्र मौन रहनु गम्भीर लापरबाही भएको भन्दै तत्काल संसदलाई जानकारी गराउन माग गरे। "अहिले विश्वमा आतंकवादी गतिविधि बढ्दो छ। यस्तो अवस्थामा संसद क्षेत्रभित्रै ड्रोन आइपुग्नु सामान्य कुरा होइन। के यो निगरानीको उद्देश्यले आएको हो? के सूचना संकलन भएको हो?," खतिवडाले प्रश्न उठाए।

उनले सुरक्षा संवेदनशीलता अत्यन्तै उच्च हुने क्षेत्रमै यस्तो घटना हुनु र त्यसबारे सांसदलाई नै जानकारी नहुनु दुःखद भएको बताए। खतिवडाले सरकारसँग माग गरे, “यस्तो गम्भीर विषयमा के भयो, कसरी भयो, संसदलाई यथाशीघ्र जानकारी दिइयोस्।”

प्रकाशित मिति: बुधबार, असार २५, २०८२

प्रतिक्रिया दिनुहोस्