रसुवा बाढी पीडितलाई तीन महिनाको तलब दिने सांसद पूर्णबहादुर तामाङको घोषणा

काठमाडौँ । नेपाली कांग्रेसका सांसद पूर्णबहादुर तामाङ (कान्छाराम)ले रसुवागढी बाढीपीडितका लागि प्रधानमन्त्री दैवी प्रकोप उद्धार कोषमा आफ्ना तीन महिनाको तलब जम्मा गर्ने घोषणा गरेका छन्।

बुधबार प्रतिनिधिसभाअन्तर्गतको अर्थ समितिको बैठकमा बोल्दै तामाङले उक्त घोषणा गरेका हुन्। उनले बाढीले ठूलो भौतिक र मानवीय क्षति पुर्‍याएको जनाउँदै पुनःनिर्माण, उद्धार र राहत कार्यमा सहयोग पुगोस् भन्ने उद्देश्यले तलब जम्मा गर्न लागेको बताए।

‘सरकारबाट पाउने तीन महिनाको तलब प्रधानमन्त्री दैवी प्रकोप उद्धार कोषमा पठाउन प्रधानमन्त्री कार्यालयलाई पत्र पठाइसकेको छु,’ तामाङले समितिमा जानकारी गराउँदै भने, ‘यसले केही राहत पुर्‍याओस् भन्ने मेरो सानो प्रयास हो।’ 

पूर्व उर्जाराज्यमन्त्रीसमेत रहेका तामाङले रसुवागढीमा आएको बाढीलाई गम्भीररूपमा लिँदै प्रभावित क्षेत्रमा सरकारलाई तत्काल राहत र दीर्घकालीन पुनर्निर्माणमा लाग्न आग्रह गरे।

मङ्गलवार बिहान आएको बाढीले नेपाल–चीन नाका जोड्ने मितेरी पुल, भन्सार कार्यालय, रसुवागढी जलविद्युत आयोजनालगायत संरचनामा ठूलो क्षति पुर्‍याएको छ। घटनामा चिनियाँ नागरिक र सुरक्षाकर्मीसमेत गरी करिब डेढ दर्जन मानिस बेपत्ता छन्।

सांसद तामाङले घटनाको प्रभावको मूल्याङ्कन गर्दै राहतका लागि थप स्रोत र संयन्त्र परिचालन गर्न आग्रह गरेका छन्।