नेपालले भन्दा पहिल्यै यी आधा दर्जन बढी देशहरुले टिकटकमाथि लगाएका थिए प्रतिबन्ध

सामाजिक सद्‍भाव खल्बलाउने माध्यमको रुपमा टिकटकको दूरुपयोग हुन थालेको भन्दै सोमबार मन्त्रीपरिषद्ले नेपालमा टिकटकको प्रतिबन्ध लगाउने निर्णय गर्यो । मन्त्रीपरिषद्को निर्णयसँगै सामाजिक संजालमा यसको पक्ष र विपक्षमा बहस नै सुरु भएको छ । 

Watch On

अरु त अरु देशका शीर्षस्थ नेताहरु नै मन्त्रीपरिषद्को निर्णय कतिपयले खुलेर स्वागत गरेका छन् त कतिपय विरोधमा उत्रिएका छन् ।

यसअघि पनि नेपालमा विभिन्न समयमा टिकटकमाथि प्रतिबन्ध लगाउने चर्चा भएको थियो तर पछिल्लो समय भने यो चर्चा चर्चामा मात्रै सिमित रहेन् । मन्त्रीपरिषद्ले नै बन्द गर्नुपर्छ भनेर सहमति जनायो । सञ्चार तथा सूचना प्रविधि मन्त्रीका अनुसार टिकटक बन्द गर्ने प्रक्रिया अघि बढिसकेको छ, प्राविधिकहरुले काम गरिरहेका कारण कतिबेलाबाट बन्द हुन्छ भन्ने यकिन छैन ।

त्यसो त टिकटक बन्द हुन नेपाल एक्लो देशमा भने हैन् । विश्वका २ दर्जन बढी मुलुकमा यसअघि नै टिकटकमाथि प्रतिबन्ध लगाइसकिएको छ । 

अरु त अरु नेपालको छिमेकी मुलुक भारतले समेत सन २०२० मा नै टिकटकमाथि प्रतिबन्ध लगाएको थियो । उसले गोपनीयतामाथि प्रश्न उठाउँदै टिकटकलगायत अन्य एप एकैसाथ बन्द गरेको थियो ।

त्यस्तै सन २०२३ मै बेलायत, न्युजिल्यान्ड, क्यानडा, बेल्जियम, डेनमार्क, सोमालिया, इरान, अष्ट्रिया, इस्टोनिया, फ्रान्स, आयरल्यान्ड, लाटभिया, माल्टा, नर्वे, अस्टे«लिया लगायतका मुलुकमा टिकटक एपलाई प्रतिबन्ध लगाइएको छ भने सन २०२२ मा अमेरिका, ताइवान, अफगानिस्तान, जोर्डन, नेदरल्यान्ड लगायतका मुलुकमा प्रतिबन्ध लगाइएको थियो ।

सन २०२० र २०२१ मा पाकिस्तान, भारत, अर्मेनिया र अजरबैजानमा टिकटकमाथि प्रतिबन्ध लगाइएको थियो भने बंगलादेशमा र इन्डोनेसियामा सन् २०१८ मा यो एप बन्द गरिएको थियो ।  

प्रतिबन्ध लगाएका मुलुकहरु अधिकांशले सुरक्षा, गोपनीयता साथै वितृष्णा फैलाएको आरोपमा टिकटकमाथि प्रतिबन्ध लगाएका छन् ।