जेन-जी अगुवा तथा अभियान्ताहरुको सामूहिक आह्वान: जेन-जी र वैकल्पिक शक्ति एक ठाउँमा उभिऔँ

काठमाडौँ । जेन-जी अगुवाहरू नै छिन्न भिन्न भएपछि सामाजिक अभियान्ताहरुले जेनजी सहित वैकल्पिक शक्तिहरू एक ठाउँमा उभिन आह्वान गरेका छन् । 

Watch On

एक विज्ञप्ति जारी गर्दै जेन-जी आन्दोलनका सुरुवातकर्ता पुरुषोत्तम यादव सहित प्रवेश दाहाल, सुप्रीया शाही ठकुरी, सुजता जिसी, महेश जैसी, निरुता पौडेल, अबिन लिम्बु, टिकाराम लिम्बु, किरण लिम्बु, प्रकाश धामी, सुप्रसिद्ध सुबेदीले जेन-जी अगुवाहरू नै छुट्टाछुट्टै बाटोमा लाग्दो आन्दोलनका उपलब्धि गुम्ने खतरा रहेको जनाएका छन् । 

उनीहरुसँगै अभियान्ता सागर ढकाल, सोम शर्मा, अजय श्रेष्ठ, हेमराज थापा, विजय कँडेल, सुसान्त वैदिक, प्रज्वल पौडेल, निकुुञ्ज भण्डारी, डम्बर साहु, अतीत बाबु रिजाल, रिवाज शर्माले ऐक्यबद्धता जनाएका छन् । 

विज्ञप्तिमा नयाँ सोच र आशा बोकेका जेन-जी लगायत वैकल्पिक शक्ति मानिएका दल तथा नेताहरू एक अर्कालाई स्वीकार गर्न नसक्दा जनताका विश्वास कमजोर हुँदै गएको अभियान्ताहरुको ठम्याई छ । 

त्यसैले सबै वैकल्पीक शक्ति र जेन-जीका अगुवाहरू आफ्ना व्यक्तिगत वा सामूहिक हठ र स्वार्थ त्यागेर एउटै मोर्चामा आएर छिन्नभिन्न रूपमा नभई एक मात्र सशक्त मूलधारको राजनीतिक शक्ति निमार्ण गर्नुपर्ने उनीहरूको माग छ । 

साथै उनीहरूले जेन-जी आन्दोलनलाई संस्थागत गराउन राष्ट्रपतिसँग सम्झौता हुनुपर्ने समेत माग गरेका छन् । 

यस्तै आन्दोलनमा सहभागीहरूलाई फौजदारी कानुनको दृष्टिकोणबाट नहेरी, आन्दोलनको मर्मबाट हेर्नुपर्ने र सोही अनुसार न्यायिक प्रक्रिया अवलम्बन गर्नुपर्ने उनीहरूको माग छ । उनीहरूले भनेका छन्, आन्दोलनकारीहरूलाई अनावश्यक थुना अभियोजन र त्रासबाट मुक्त गराउन सरकारसँग माग गर्दछौँ । 

उनीहरूले विदेशमा रहेका नेपालीहरूलाई फागुन २१ को निर्वाचन मत हाल्न पाउने व्यवस्था मिलाउन पनि आग्रह गरेका छन् ।