लुम्बिनी लायन्सको दोस्रो जित, पोखरा एभेन्जर्स ३ विकेटले पराजित

काठमाडौँ । नेपाल प्रिमियर लिग (एनपीएल) मा लुम्बिनी लायन्सले दोस्रो जित दर्ता गर्दै प्रतियोगितामा पुनरागमन गरेको छ। शनिबार कीर्तिपुरस्थित त्रिवि अन्तर्राष्ट्रिय क्रिकेट मैदानमा भएको खेलमा लुम्बिनीले पोखरा एभेन्जर्सलाई ३ विकेटले हरायो।

Watch On

पोखराले दिएको १५१ रनको लक्ष्य लुम्बिनीले १९.४ ओभरमा ७ विकेट गुमाइ पूरा गर्‍यो। अन्तिम ओभरमा १० रन आवश्यक परेको अवस्थामा सन्दीप जोराले लगातार दुई चौका प्रहार गर्दै नाटकीय जित दिलाए।

लगातार तीन हारको दबाबमा रहेको लुम्बिनीका लागि यो जित राहतपूर्ण भयो। पाँच खेलबाट ४ अंक जोड्दै लुम्बिनी अंकतालिकामा पाँचौँ स्थानमा उक्लिएको छ।

ब्याटिङतर्फ कप्तान रोहित पौडेलले ४० रनको योगदान दिए। एनपीएलमा डेब्यु गरेका श्रीलंकन खेलाडी निरोशन डिकवेलाले ३७ रन जोडे। सन्दीप जौरा २५ रनमा अविजित रहे।

पोखराका बिपिन खत्री, म्याट टेलर र सागर ढकालले समान दुई–दुई विकेट हात पारे।

यसअघि टस हारेर पहिले ब्याटिङ गरेको पोखराले ५ विकेट गुमाउँदै १५० रनको प्रतिस्पर्धात्मक योगफल बनाएको थियो। ओपनर एडम रोसिङ्गटनले ६३ बलमा ७ चौका र ५ छक्का सहित ८१ रन बनाए। जिमी नीशमले ३२ बलमा ३ चौका र ३ छक्का प्रहार गर्दै अविजित ५१ रन जोडे। दुवैले पाँचौँ विकेटका लागि ९२ रनको साझेदारी गर्दै पोखराको पारी सम्हाले।

लुम्बिनीका शेर मल्ल र तिलक भण्डारीले दुई–दुई विकेट लिए भने गुलबादिन नइबले एक विकेट हात पारे।