हेटौंडामा मेरो बुलन्द आवाज जुनियर सिजन–१ हुँदै

मकवानपुर । हेटौंडामा मेरो बुलन्द आवाज जुनियर सिजन–१ हुने भएको छ । आज एक प्रेस विज्ञप्ति जारी गर्दै मनको कुरा मञ्चसम्म भन्ने मूल नारा सहित मेरो बुलन्द आवाज जुनियर सिजन–१ पब्लिक स्पिकिङ कार्यक्रम हुन लागेको हो । पब्लिक स्पिकिङ ट्रेनिङ सेन्टर हेटौंडा र ड्रिम्स म्युजिक स्कुल हेटौँडाको साझा प्रयासमा सिजन–१ हुन लागेको पब्लिक स्पिकिङ ट्रेनिङ सेन्टर हेटौंडाका  प्रमुख रुपक कालिराजले जानकारी दिएका छन् । 

मकवानपुर जिल्लामा पहिलो पटक पब्लिक स्पिकिङ रियालिटी शो आयोजना गर्न लागेको जानकारी गराउन पाउँदा हर्षित भएको उनको भनाई छ । जिल्लाभरीका विद्यार्र्थीहरूलाई आत्म–विश्वास, अभिव्यक्ति क्षमता, वक्तृत्वकला र नेतृत्वगुण विकासमा सहयोग पुर्याउने उद्देश्यले कक्षा ६ देखि १० सम्ममा विद्यार्थीहरुलाई लक्षित गरी विद्यालयहरुमै पुगेर छनौट गरिने बताईएको छ । 

कार्यक्रमका निर्देशक अनन्त खुलालका अनुसार मेघा अडिसनका लागि स्टुडियोको निर्माण अन्तिम चरणमा पुगिसकेको र प्रि—अडिसन २०८२ मंसिर १५ गतेदेखि शुरु हुने जानकारी दिएका छन् ।आयोजकका अनुसार सिजन १ का लागि निर्णायकको रुपमा लामो समय खोजपत्रकारितामा सकृय देवराज पन्त रहेका छन् । आमसञ्चार विषयमा मास्टर्स डिग्री गरेका उनी हाल सिधाकुरा डटकममा आवद्ध रहेका छन् । 

त्यस्तै, निर्णायकमा आधुनिक राष्ट्रिय माविका सह—प्रधानाध्यापक तथा अङ्ग्रेजी विषय शिक्षिका मालती पोखरेल, तुलसी मेयर मोमोरियल माविका सहायक प्रिन्सीपल तथा नेपाली भाषा शिक्षक पूर्व रेडियोकर्मी कमल नेपाल रहेका छन् । मेघा अडिसनमा अतिथि निर्णायकहरु समेत रहने आयोजकले जनाएको छ । 
जुनियर सिजन १ का विजेतामा प्रथम् हुनेले नगद ५० हजार, शिल्ड प्रमाणपत्र, दोश्रो हुनेले नगद ३० हजार र तेश्रो हुनेले नगद २० हजारसहित शिल्ड, प्रमाणपत्र प्राप्त गर्नेछन् । जुनियर सिजन–१ कार्यक्रम सम्पन्न गर्न करीब १० लाख रुपैया खर्च हुने अनुमान गरिएको छ । प्रवेश शुल्क निशुल्क रहेको अडिसनमा करिब ५ सय जनाको सहभागिता हुने अपेक्षा गरिएको छ ।