कलाकार धतुरेको किन आलोचना भइरहेको छ ?

काठमाडौँ । यतिबेला हास्य कलाकार चिरञ्जीवी पुडासैनी उर्फ धतुरे सामाजिक सञ्जालमा आलोचनाको शिकार भइरहेका छन् । शनिबार एक राजनीतिक कार्यक्रममा दिएको उनको अभिव्यक्ति विवादमा परेको हो । 

उज्यालो नेपाल पार्टीको चितवनमा आयोजित कार्यक्रममा पुडासैनीले रवि लामिछानेको आलोचना गरेका थिए ।

शनिबार मात्रै उनी कुलमान घिसिङ संरक्षक रहेको उज्यालो नेपाल पार्टीमा प्रवेश गरेका थिए । चितवनमा आयोजित कार्यक्रममा उनी घिसिङसँग पार्टी प्रवेश गरेर एक भाषण दिएका थिए । 

उनी प्रवेश गरेको पार्टीको कार्यक्रम र रविको निर्वाचन क्षेत्रमै थियो । जहाँ रास्वपाका हजारौँ कार्यकर्ता रविको स्वागतका लागि भेला भएका थिए । 

रवि आफ्नो निर्वाचन क्षेत्रमा सार्वजनिक भएकै दिन नै रहेको सो पार्टीको भेलामा धतुरेले रवि सहकारीको रकम अपचलन गरेको अभिव्यक्ति दिएका थिए । पार्टी प्रवेश गरेकै दिन आफ्नो पार्टी मात्रै सफा रहेको दाबी गर्दै उनले रवि विरुद्ध आक्रोश पोखेका थिए । 

तर, उनै कलाकार धतुरे केही महिना अघि मात्रै रविमाथि राजनीतिक प्रतिशोध भएको भन्दै रविको पक्षमा हस्ताक्षर अभियानमा सहभागी भएका थिए ।

रविका दाइ हरिशरण लामिछाने लगायतले भक्तपुरको नगरकोटमा गरेको हस्ताक्षर अभियानमा उनै धतुरे सहभागी भएका थिए । गत जुलाई ४ मा उनले आफ्नो फोटोसहितको एक सन्देश पोष्ट गर्दै मैले त हस्ताक्षर गरिसके तपाईंले नी भन्दै फेसबुकमा लेखेका थिए । 

अहिले उनै धतुरेले दोहोरो कुरा गरेको भन्दै उनको आलोचना गरेका हुुन् । पाँच महिना अघि र अहिले फरक फरक कुरा गरेको भन्दै उनलाई मानिसहरूले दुई जिब्रेको संज्ञ दिएका छन् ।