निर्वाचनलाई स्वच्छ, निष्पक्ष र धाँधलीरहित बनाउन सबैले जिम्मेवारी पूरा गर्नुपर्नेः प्रचण्ड

काठमाडौँ । नेपाली कम्युनिष्ट पार्टी(नेकपा)का संयोजक पुष्पकमल दाहाल प्रचण्डले आसन्न निर्वाचनलाई स्वच्छ, निष्पक्ष र धाँधलीरहित बनाउन सबैले आफ्नो ठाउँबाट जिम्मेवारी पूरा गर्नुपर्ने बताएका छन् ।

नेकपा नुवाकोट–काठमाडौं सम्पर्क समन्वय समितिले शुक्रबार काठमाडौंमा आयोजना गरेको कार्यक्रममा प्रचण्डले अहिले विषम परिस्थितिमा निर्वाचन हुन लागेको भन्दै सुरक्षा निकाय, निर्वाचन आयोग लगाएत सवैले आसन्न निर्वाचनलाई स्वच्छ, निष्पक्ष र धाँधलीरहित बनाउन सबैले आफ्नो ठाउँबाट जिम्मेवारी पूरा गर्नुपर्ने बताएका हुन ।

Watch On

नेपालका सेना, प्रहरी लगाएत सवैमाथि भरोसा भएपनि सबै जिम्मेवार हुन नसके भाद्र २४ को जस्तै घटना दोहरिन सक्ने उनले बताए । प्रचण्डले कुनैपनि हालतमा निर्वाचनमा धाँधली भयो भनेर प्रश्न उठाउने ठाउँ राख्न नहुने धारणा राखेका थिए।

नेकपाले अहिले कसैसँग कुनै तालमेल नगर्ने र जनतामा भरमा अग्नि परीक्षा पार गर्ने उल्लेख गर्दै प्रचण्डले निर्वाचन स्वच्छ, निष्पक्ष र धाँधली रहित बनाउन सके एक नम्बर पार्टी बनाउन कसैले रोक्न नसक्ने दावी गरे । भाद्र २३ गते युवाहरुमाथि दमन गर्ने अतिवादी अहंकारी प्रवृत्ति र भाद्र २४ गते विध्वंश मच्चाउने देशी विदेशी प्रतिक्रियावादीहरूका विरुद्ध नेकपा खडा भएको उनले बताए ।

प्रचण्डले देशैभरको अवस्था हेर्दा नेकपाको पक्षमा उभारको स्थिति देखा परेको र पुराना भनिएका अन्य पार्टीहरु निकै असहज र अप्ठ्यारो परिस्थितिमा रहेको उल्लेख गरेका थिए । उनले निर्वाचनका क्रममा धाँधली हुन नदिन सवै बुथ र वडामा आवश्यक तयारी गर्न सर्कुलर समेत जारी गरिएको जानकारी दिए ।