काठमाडौँ  : काठमाडौँ महानगरपालिकाका मेयर बालेन साह काठमाडौँमा रहेको खोला अतिक्रमणको समस्या प्रधानमन्त्रीले चाहेमा प्रधानमन्त्री एउटा कार्यक्रमबाट अर्को कार्यक्रममा पुग्ने समयमा खोला समाधान हुने बताएका छन् । 

ललितपुर महानगरपालिकाको १५ औं वार्षिक उत्सवलाई सम्बोधन गर्दै उनले ललितपुरमा खोला अतिक्रमणको समस्या नरहेको तर काठमाडौँमा भएका कारण यदि प्रधानमन्त्रीले चाहे प्रधानमन्त्री एउटा कार्यक्रमबाट अर्को कार्यक्रममा पुग्ने समयसम्म उक्त समस्या समाधान गर्न सकिने बताएका हुन् ।

‘कुनै कुनै अतिक्रमण हामी स्थानीय सरकारले चाहे पनि रोक्न सक्छौँ । तर  खोला अतिक्रमणको विषय सम्मानित प्रधानमन्त्रीलाई आग्रह गर्न चाहेँ । यदि सम्मानित प्रधानमन्त्रीले चाहानुभयो भने, अहिले यहाँ कार्यक्रमबाट अर्को कार्यक्रममा जान जति समय लाग्छ त्यति समयमा समाधान हुने विषय हो त्यो ।’ उनले थपे, ‘प्रधानमन्त्रीले चाहानुभयो भने, गृहमन्त्रीले चाहानुभयो भने ५ मिनेट देखि १ घण्टाभित्र सल्टिने समस्या पनि छन् । ’

त्यस्तै उनले सिसडोल र बञ्चरेडाँडामा फोहोर व्यवस्थापन गर्न समस्या भइरहेका कारण त्यसलाई संघीय सरकारले सहज बनाइदिन समेत प्रधानमन्त्रीलाई आग्रह गरेका छन् । 

उपत्यकाको फोहोर व्यवस्थापन गर्ने विषयमा संघीय सरकार र स्थानीय सरकारको कानुन एकआपसमा बाझिएका कारण काम गर्न असहज भएको भन्दै उनले उक्त अड्चन फुकाइदिन प्रधानमन्त्रीलाई आग्रह गरेका हुन् ।