कार्की आयोगको प्रतिवेदन बुझेपछि प्रधानमन्त्रीले भनिन्– कार्यान्वयनको प्रक्रियामा अघि बढ्छ

काठमाडौँ । प्रधानमन्त्री सुशीला कार्कीले जेनजी आन्दोलनमा भएको क्षतिको छानिबिन गरी कारबाहीका लागि सिफारिस गर्न बनेको जाँचबुझ आयोगले बुझाएको प्रतिवेदन अध्ययन गरी कार्यान्वयन प्रक्रियामा अघि बढाउने बताएकी छन् ।

आयोगको प्रतिवेदन बुझेपछि प्रधानमन्त्री कार्कीले कार्यान्वयनमा लैजाने बताएकी हुन् । उनले सुरुमा आफू र गृहमन्त्रीले अध्ययन गरी मन्त्रिपरिषदमा लैजाने जानकारी दिइन् । कार्कीले भनिन्– अब यसको अध्ययन गरी कार्यान्वयको प्रक्रिया अघि बढ्छ।’

Watch On

उनले प्रतिवेदन सार्वजनिक गर्ने कुरामा पनि छलफल हुने जानकारी दिइन् । ‘यसको विवरण हेरेर पूरै दस्तावेज तत्कालै सार्वजनिक गर्न नसके निचोड मात्र भए पनि सार्वजनिक गर्छौँ।’ उनले भनिन् ।

त्यसअघि आयोगका अध्यक्ष गौरीबहादुर कार्कीले आफूहरूले इमानदारीसाथ काम गरेको र बिनाकुनै पूर्वाग्रह जे देख्यो त्यही कुरा प्रतिवेदनमा राखेको जानकारी दिएका थिए । उनले भविष्यमा यस्तो घटना नहोस् भनेर सुझाव पनि प्रतिवेदनमा राखेको बताए ।

उनले भने, ‘कुशासनका कारण यो घटना भएको छ। नियमनकारी निकायहरूलाई विकृत पारिएको छ। न्यायपालिका, कार्यपालिका सबैतिर ढिलासुस्ती छ। न्यायाधीशदेखि संवैधानिक नियुक्तिसमेत दलीय भागबण्डामा गर्ने प्रवृत्तिले आक्रोश बढेको पाइएको छ। यो प्रतिवेदन कार्यान्वयन भएमा देशको मुहार फेरिन्छ।’

आयोगका सदस्य विज्ञानराज शर्माले यो प्रतिवेदन जाँचबुझ मात्र भएकाले अब कारबाही गर्ने निकायले अनुसन्धान गर्नुपर्ने र यसमा अनुसन्धानका लागि आधार तयार गरिदिएको बताए । अर्का सदस्य विश्वेश्वर भण्डारीले सुशासनका लागि के गर्ने भन्ने विषयमा प्रतिवेदनले उल्लेख गरेका कुरा कार्यान्वयन गर्न सके मुलुकको अवस्था धेरै फेरिन सक्ने बताए।