‘दुई सिफ्टमा काम गराएर भएपनि २८ दिनमा मेलम्चीको पानी काठमाडौँ झार्छौँ : मेलम्ची विकास समिति

काठमाडाैँ : सरोकारवाला निकायको लापरवाहीले मेलम्चीको पानी अवरुद्ध भएको भन्दै काठमाडौँवासी आन्दोलित बनेपछि मेलम्ची खानेपानी विकास समितिले २८ दिनभित्र पानी काठमाडौँमा ल्याइसक्ने बताएको छ । 

Watch On

 मेलम्ची खानेपानी विकास समितिले एक विज्ञप्ति जारी गर्दै दुई सिफ्टमा काम गराएर भएपनि २८ दिनमा मेलम्चीको पानी काठमाडौँमा झार्ने बताएको छ ।

‘तत्काल निर्माण व्यवसायीलाई साइडमा परिचालनका लागि आवश्यक सहजीकरण र समन्वय गर्ने निर्णय भएको छ । निर्माण व्यवसायी सिनोहाइड्रो मार्फत नै तत्काल कार्य सुचारु गर्ने र मेलम्ची नदीको पानी पथान्तरण गर्ने सहमति भएको छ, सहमति अनुसार निर्माण व्यवसायी सिनोहाइड्रो तत्कालै साइटमा परिचालन हुनेछ र आकस्मिक परिस्थिति पर्न आए बाहेक बढीमा २८ दिनको द्रुत कार्यतालिका अनुसार जनशक्ति परिचालन गरी पानी पथान्तरणको काम हुनेछ ।’, विज्ञप्तीमा भनिएको छ ।

असार ७ गते मेलम्ची खोलामा आएको बाढीका कारण बन्द भएको मेलम्चीको पानी मर्मत र सरसफाई गर्ने जिम्मा पाएको निर्माण कम्पनीले काम अघि नबढाउँका पानी काठमाडाैँ झरेको छैन । सोही कारण काठमाडौँबासीले आन्दोलन थालेपछि विकास समितिले २८ दिनभित्र काठमाडौँमा पार्नी झार्ने प्रतिबद्धता गरेको हो । 

त्यस्तै पथान्तरणपछि मेलम्चीको पानी दैनिक १७ करोड लिटरका दरले उपलब्ध हुने समेत समितिले जनाएको छ ।