आधा सिलिन्डर ग्यास बिक्री सुरु गर्दै निगमले भन्यो, ‘यो कृत्रिम अभाव हो, आपूर्तिमा समस्या छैन’

काठमाडौँ । नेपाल आयन निगमले आजबाट आधा ग्यास सिलिन्डर बिक्री गर्न सुरु गरिएको बताएको छ । शुक्रबार काठमाडौंमा पत्रकार सम्मेलन गर्दै निगमका प्रवक्ता मनोजकुमार ठाकुरले कृतिम अभावलाई समाधान गर्दै ग्यासको आपूर्ति तथा वितरण प्रणालीलाई व्यवस्थित बनाउन आधा भरिएको ग्यास विक्रि गर्न थालिएको जानकारी दिए । 

प्रवक्ता ठाकुरले नेपालमा प्रयाप्त रुपमा ग्यास आपूर्ति भइरहेकाले अनावश्यक भण्डारण नगर्न आम उपभोक्तालाई आग्रह समेत गरे । उनका अनुसार आजको दिनसम्म मागको शतप्रतिशत ग्यास आपूर्ति भएपनि भोलीको दिनमा के हुन्छ भन्ने स्पष्ट छैन । 

Watch On

त्यस्तै निगमले नेपालमा भारतबाट एलपी ग्यास आपूर्तिमा कुनै समस्या नरहेको जनाएको छ । अहिलेसम्म माग अनुसार नै भारतबाट ग्यास आपूर्ति भइरहेकाले आपूर्तिमा कुनै समस्या नरहेको ठाकुर बताउँछन् । अभाव हुने हल्लाका कारण अनावश्यक रुपमा ग्यासको सञ्चिति बढाएका कारण अहिले बजारमा ग्यास अभावजस्तो देखिएको उनको भनाई छ । 

निगमले डिजेल र पेट्रोलको हकमा १५–१५ दिनमा नयाँ मूल्यसूची आउने भएपनि हवाई इन्धन र एलपि ग्यासको हकमा एक महिनामा नयाँ मूल्यसूची आउने भएकाले नयाँ सूची प्राप्त भएपछि ग्यासमा बृद्धि भएको मूल्य यकिन हुने उल्लेख गरे । त्यसपछि मात्रै ग्यासको मूल्य समायोजन हुने वा नहुने भन्ने आवश्यक निर्णय निगमले जनाएको छ ।