संसदीय राजनीतिबाट संन्यास लिदैं डा.राउतले भने, ‘अधिकार र पहिचानको सङ्घर्ष जारी रहन्छ’

काठमाडौँ । जनमत पार्टीका अध्यक्ष डा.सिके राउतले संसदीय राजनीतिबाट संन्यास लिने घोषणा गरेका छन् । उनले आइतबार सामाजिक सञ्जालमा पोस्ट गर्दै आफूले संसदीय राजनीतिबाट संन्यास लिएको कुरा व्यक्त गरेका हुन ।

उनले भने, ‘अब पदको राजनीतिबाट टाढा रहने तर जनताको अधिकार र पहिचानका लागि सङ्घर्षको राजनीति भने निरन्तर जारी राख्ने छु।’

Watch On

आफूले व्यक्तिगत इच्छा विपरीत दुई पटक संसदीय निर्वाचन लडेको उल्लेख गर्दै एक पटक जित र एक पटक हार व्यहोरेको बताए। तर दुवै निर्णयप्रति आफू सन्तुष्ट रहेको उनको भनाइ छ।

इच्छा विपरीत पार्टी खोल्नु परेको कुरालाई व्यक्त गर्दै उनले भनेका छन् । ‘२०७५ सालमा ‘स्वतन्त्र मधेस गठबन्धन’लाई सरकारले काम गर्न नदिएको र जनतामाझ जान रोक लगाएपछि पार्टी गठन गर्नुपर्ने अवस्था आएको थियो । अन्य नेताहरूले अध्यक्ष बन्न नमानेपछि आफू नै पार्टीको नेतृत्व सम्हाल्नुपरेको थियो ।’

अध्यक्ष राउतले जबरजस्ती दुई दुई पटक चुनाव लड्नु परेको कुरालाई समेत सामाजिक सञ्जालमा व्यक्त गरेका छन् । उनले भने, ‘२०७९ सालको आमनिर्वाचनमा आफू प्रत्यक्ष वा समानुपातिक कतैबाट नलड्ने सोच बनाएको भए पनि पार्टीका नेताहरूको आग्रहपछि निर्वाचनमा भाग लिए ।

सो निर्णयका कारण पार्टीले प्रत्यक्षतर्फ एक सिट र समानुपातिकतर्फ पाँच सिट जित्दै राष्ट्रिय पार्टी बन्न सफल पनि भयो । त्यस्तै २०८२ को निर्वाचन नलड्ने निर्णय पहिल्यै गरेको भए पनि अन्तिम समयमा पार्टीका नेताहरू र कार्यकर्ताको मनोबल नघटोस् भनेर फेरि उम्मेदवारी दिए । परिणाम आएपछि पनि साथीहरूको सल्लाह मानेर चुनाव लडेको निर्णय सही भएको महसुस भएको छ ।’

त्यस्तै, राउतले अब संसदीय वा पदको राजनीतिबाट विश्राम लिने तर राजनीतिबाट भने अलग नहुने स्पष्ट पारेका छन्। उनले आफ्नो सिद्धान्त, एजेन्डा र जनताको अधिकारका लागि निरन्तर सङ्घर्ष गर्ने प्रतिबद्धता जनाएका छन्। साथै उनले आगामी स्थानीय तह र प्रदेश निर्वाचनका लागि पार्टीलाई तयारी गराउने र जनताको सेवामा निरन्तर सक्रिय रहने बताएका छन्।